Veprimtaria e shumë prej institucioneve private shëndetësore në Kosovë është kthyer në sfidë për shtetin, pasi që ato po operojnë vazhdimisht në mënyrë të kundërligjshme me shërbime të palicencuara dhe staf ilegal (të palicencuar), gjë që paraqet edhe rrezik për shëndetin dhe jetën e pacientëve.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin poliklinika “Dr. Gëzim Bajrami” në Ferizaj është gjobitur me 2 mijë euro për shkelje të Ligjit për Shëndetësi.
Në arsyetimin e vendimit të siguruar nga Veriu.info që mban datën 15 qershor 2026, thuhet se Inspektorati Shëndetësor ka realizuar inspektim më 19 maj për të verifikuar nëse poliklinika “Dr. Gëzim Bajrami” është duke e zbatuar vendimin për pezullimin e veprimtarisë shëndetësore të laboratorit mjekësor të Biologjisë Hematologjike, por që ka zbuluar se kjo poliklinikë ka bërë analiza laboratorike edhe pas datës së pezullimit të veprimtarisë.
Gjatë këtij inspektimit është zbuluar edhe se në poliklinikën “Dr. Gëzim Bajrami” po ofrojnë shërbime shëndetësore Donjeta Lipovica dhe Anila Bajrami në mënyrë të kundërligjshme, pasi që të njëjtat nuk janë të lajmëruara në Divizionin për Licencim dhe Akreditim në Ministrinë e Shëndetësisë.
Në poliklinikën “Dr. Gëzim Bajrami” inspektorati ka gjetur edhe fillerë, për aplikimin e të cilëve ky institucion privat shëndetësor nuk e ka të lajmëruar si shërbim në Divizionin për Licencim dhe Akreditim në Ministrinë e Shëndetësisë, por që Gëzim Bajrami para inspektorëve ka pohuar se e ka ofruar këtë shërbim.
“Në vijim të inspektimit, u evidentuan rezultate të analizave laboratorike të gjeneruara të pacientëve, pas datës së hyrjes në fuqi të Vendimit për pezullimin e shërbimit laboratorik. Rezultatet e evidentuara përmbanin të dhëna që dëshmojnë kryerjen dhe raportimin e analizave laboratorike në periudhën kur vendimi për pezullim ishte në fuqi. Këto analiza ishin në emër të mjekut të laboratorit Dr. Ganimete Nuhiu Sylejmani – specialist e biokimisë klinike. Nga verifikimi i sistemit elektronik të DLA/MSh u pa se në shërbimin e laboratorit mjekësor biokimik hematologjik profesionistët shëndetësorë Ganimete Nuhiu Sylejmani – specialiste e Biokimisë Klinike dhe z. Hysa Osmani – laborant i biologjisë figurojnë me status “Liruar” nga institucioni shëndetësor. Sipas të dhënave të regjistruara në sistem, të njëjtit nuk rezultonin të angazhuar në institucion në momentin e kryerjes së inspektimit”, thuhet në arsyetimin e vendimit për gjobitjen e kësaj poliklinike.
Pas evidentimit të këtyre shkeljeve ligjore, inspektorati në arsyetim ka theksuar se themeluesi i kësaj poliklinike Gëzim Bajrami ka deklaruar se ka ofruar shërbime laboratorike edhe pas datës së hyrjes në fuqi të Vendimit për pezullimin e shërbimit laboratorik.
Veriu.info ka tentuar të marrë një qëndrim të poliklinikës “Dr. Gëzim Bajrami” përmes emailit që e ka të deklaruar në ARBK, por deri në momentin e publikimit të artikullit nuk janë kthyer përgjigjet për pyetjet e dërguara.
LEXONI EDHE:
