Gazetari Vehbi Kajtazi ka shpërndarë një reportazh të botuar nga The Washington Post në vitin 2000 dhe ka hedhur akuza të rënda ndaj personit që fshihet pas profilit të rremë “Lule Gjeli”.
Kajtazi rikujton se më 5 janar 2000, The Washington Post kishte publikuar reportazhin me titull “Ëndrra amerikane e një refugjati”, kushtuar Gent Prokshit, atëherë 14-vjeçar, refugjat nga Kosova, i cili ëndërronte të ndërtonte jetën e tij në Shtetet e Bashkuara të Amerikës.
Sipas Kajtazit, reportazhi përshkruante pasionin e Prokshit për kompjuterët dhe dëshirën e tij për të mos u kthyer në Kosovë, ndonëse familja ishte rikthyer me vendim të babait të tij, shkrimtarit Iljaz Prokshi.
Kajtazi duke cituar gazetën amerikane tregon se vite më vonë autorja e reportazhit është rikthyer në Kosovë dhe ka takuar sërish Gent Prokshin, ndërsa shton se ai më pas është kthyer përsëri në SHBA.
Në postimin e tij, Kajtazi ka thenë se Gent Prokshi është personi që qëndron pas profilit të rremë “Lule Gjeli”, përmes të cilit, sipas tij, janë shpërndarë mesazhe urrejtjeje dhe sulme në rrjetet sociale.
“Ai iku sërish atje dhe prej shumë vitesh, i maskuar pas një profili fallc, përhap urrejtje në vendin që kurrë nuk e deshi”, ka shkruar Kajtazi.
Ai ka drejtuar edhe akuza politike, duke e lidhur aktivitetin e pretenduar të profilit me kryeministrin në detyrë, Albin Kurti.
“Është Albin Kurti në tastierë. Është llumi i arratisur nga vendi i tij. Është dështaku frikacak që nuk ka mundur të punojë e të jetojë në Kosovë”, ka shkruar Kajtazi.
Pretendimet e gazetarit Vehbi Kajtazi janë bërë publike në rrjetet sociale dhe, deri më tani, nuk ka pasur reagim nga Gent Prokshi lidhur me këto akuza.
