Ish-kryetari i Odës Ekonomike të Kosovës, Safet Gërxhaliu, tha se gjendja ekonomike në vend është shqetësuese për shkak të fokusit te politika.
“Në aspektin ekonomik, situata në Kosovë është vërtet mjaft shqetësuese, nga fakti që është një agjendë politike e cila po e nënçmon zhvillimin ekonomik”, tha ai për Ekonomia Online.
Sipas Gërxhaliut, rritja e çmimit të naftës në tregjet ndërkombëtare do të ndikojë drejtpërdrejt në rritjen e inflacionit në Kosovë.
Ai paralajmëroi se inflacioni mund të arrijë në 7 deri në 7.5 për qind, duke goditur standardin e jetesës.
“Fuqia blerëse në Kosovë çdo ditë është definitivisht më e dobësuar”, u shpreh ai.
Gërxhaliu tha se Kosova po importon inflacion për shkak të varësisë së madhe nga importi dhe rritjes së çmimeve të energjisë.
Në fund, ai bëri thirrje që ekonomia të bëhet prioritet institucional.
“Definitivisht është koha kur duhet të jetë ekonomia prioritet dhe jo vetëm politika të jetë dominante në aktualitetin kosovar”, deklaroi Gërxhaliu.
