Prokuroria Themelore në Prishtinë ka bërë të ditur se ka ndaluar tre persona në lidhje me aksidentin tragjik që ndodhi dje në vendpunishten e kompanisë “Vllezërit Asllani” në Prishtinë, ku humbi jetën një punëtor, ndërsa një tjetër mbeti i lënduar rëndë.
Sipas Prokurorisë, prokurori kujdestar është njoftuar për rastin rreth orës 15:00 të së hënës dhe menjëherë ka dalë në vendin e ngjarjes së bashku me Policinë e Kosovës, Njësinë Rajonale të Hetimeve dhe Inspektoratin e Punës.
“Menjëherë pas pranimit të informatës, prokurori i shtetit ka dalë në vendin e ngjarjes, së bashku me Policinë e Kosovës, Njësinë Rajonale të Hetimeve dhe Inspektoratin e Punës, me qëllim të ndërmarrjes së të gjitha veprimeve të nevojshme hetimore”, thuhet në komunikatë.
Prokuroria ka bërë të ditur se, me urdhër të prokurorit, janë angazhuar ekspertë të pavarur të sigurisë në punë dhe një ekspert i inxhinierisë mekanike, ndërsa janë siguruar prova materiale, janë sekuestruar pamjet e kamerave të sigurisë dhe është kryer ekzaminimi i vendit të ngjarjes nga njësia e forenzikës.
Po ashtu, janë intervistuar dëshmitarët okularë dhe personi i lënduar, i cili po trajtohet në Qendrën Klinike Universitare të Kosovës (QKUK).
“Si pasojë e këtij aksidenti, një person me inicialet E.Sh. ka humbur jetën, ndërsa një person tjetër ka pësuar lëndime të rënda trupore”, njofton Prokuroria.
Lidhur me rastin, Prokuroria ka iniciuar hetime për veprat penale “Shkaktimi i rrezikut të përgjithshëm” dhe “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.
Bazuar në dyshimet fillestare dhe provat e siguruara deri në këtë fazë, me urdhër të Prokurorit të Shtetit janë ndaluar tre persona.
“Me urdhër të Prokurorit të Shtetit janë ndaluar tre persona. Me inicialet A.Sh., nën dyshimin e kryerjes së veprës penale ‘Shkaktimi i rrezikut të përgjithshëm’, si dhe B.S., në cilësinë e personit përgjegjës të kompanisë ndërtuese, dhe E.E., në cilësinë e personit të kompanisë investuese të projektit, nën dyshimin e kryerjes së veprës penale ‘Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës’”, thuhet në njoftim.
Prokuroria ka bërë të ditur se brenda afatit ligjor do të shqyrtojë kërkesën për caktimin e masave të sigurisë ndaj të dyshuarve dhe do të vazhdojë hetimet për zbardhjen e plotë të rrethanave të rastit.
