Gjykata Themelore në Prishtinë – Departamenti Special, ka aprovuae kërkesën e Prokurorisë Speciale të Republikës së Kosovës duke ua caktuar masën e paraburgimit të pandehurve M.J., dhe M.B., të cilët dyshohen për krime lufte.
Gjykata njofton se pas mbajtjes së seancës dëgjimore, gjyqtarja e procedurës paraprake ka aprovuar kërkesën e PSRK-së duke ua caktuar të dyshuarve masën e paraburgimit në kohëzgjatje prej një muaji për secilin.
“Gjykata vlerësoj se caktimi i masës së paraburgimit në këtë çështje penale është masë adekuate, pasi ekziston rrezik real që nëse të pandehurit lihen në liri, mund të arratisen me qëllim të fshehjes dhe ikjes nga përgjegjësia penale, po ashtu duke marr parasysh se të pandehurit janë edhe shtetas të Serbisë, ekziston rreziku real që të arratisen lehtë dhe të jenë të pa arritshëm për organet e drejtësisë, me çka do të pamundësohet sigurimi i prezencës së tyre dhe do të pengohej rrjedha normale e procedurës penale”, thuhet në njoftim.
Gjykata gjithashtu vlerësoi se nëse të pandehurit lihen në liri, ekziston rreziku që të ndikojnë në prova dhe në dëshmitarë, andaj konstatoi se masa e paraburgimit tani për tani është e vetmja masë, për rrjedhjen e papenguar të procedurës penale, në këtë çështje penale.
Një ditë më parë, PSRK-ja njoftoi se të pandehurit M.J., dhe M.B., dyshohen se kanë kryer krime lufte ndaj popullsisë civile në rajonin e Mitrovicës, saktësisht rasti ka të bëjë me vrasjen dhe zhdukjen e 23 civilëve
Po ashtu, me kërkesë të Prokurorisë Speciale të Republikës së Kosovës dhe urdhrit të Gjykatës Themelore në Prishtinë, të martën u zbatua urdhri për zhvarrosje, autopsi dhe identifikim të mbetjeve mortore në një lokacion në Komunën e Zubin-Potokut. Nga IML-ja konfirmuan se mbetjet mortore që u gjetën në fshatin Kalludër, janë të njerëzve dhe se do të vazhdojnë me ekzaminimet.
