Katër vjet pasi partia e tij kishte dalë kundër ndarjes së tokës për organzimin e festivalit “Sunny Hill”, Albin Kurti ka thënë sot se ky festival është një nga ngjarjet kryesore kulturore të Kosovës.
Në detyrën e kryeministit, Kurti priti sot Dua Lipën duke e uruar për fillimin e edicionit të sivjetëm të festivalit “Sunny Hill”.
“Festivali Sunny Hill, i organizuar nga Dua Lipa, është bërë një nga ngjarjet kryesore kulturore të Kosovës, duke tërhequr më shumë se 100,000 vizitorë vetëm vitin e kaluar. Ndërsa festivali fillon sot, i urojmë të gjithëve një përvojë të mrekullueshme dhe të paharrueshme. Shijoni muzikën, atmosferën dhe gjithçka që Prishtina dhe Kosova kanë për të ofruar” shkroi Kurti në X.
Mirëpo, vetëm katër vjet më pare Lëvizja Vetëvendosje kishte dalë kundër vendimit të Komunës së Prishtinës për ndarjen e 17 hektarëve tokë për organizimin e këtij festivali.
Asamblistët e VV-së kishin votuar kundër vendimit të Komunës, ndërkaq shefi i tyre, Gëzim Sveçla kishte hedhur dyshime për mënyrën e organizimit të procesit.
“Duhet ta mirëpresim heqjen dorë të Sunny Hill nga insistimi për 99 vjet pronë. Tash çdo gjë është në rregull. Nuk ka arsye të braktiset Prishtina nga ky Festival, përveç nëse nuk është në pyetje ndonjë pazar tjetër, i mëhershëm”, kishte thënë ai.
Përpos tij, atë kohë kishte reaguar edhe ministri i Kulturës, Hajrulla Çeku, i cili nuk e kishte kaluar vendimin e Komunës së Prishtinës për ndarjen e tokës në të mirë të “Sunny Hill”.
Çeku kishte thënë se nuk ishte e drejtë që organizatorët të kërkonin një vendim urgjent nga ana e tij.
