SPAK ka publikuar detaje të reja lidhur me operacionin ndërkombëtar që çoi në arrestimin e Ermal Beqirit në Francë, si dhe zbulimin e një pasurie të paluajtshme e financiare me vlerë miliona euro, e cila dyshohet se rrjedh nga veprimtari kriminale.
Sipas njoftimit zyrtar të SPAK, Beqiri ishte regjistruar si person nën hetim që prej 5 dhjetorit 2025. Ndaj tij rëndojnë një sërë akuzash të rënda penale, duke përfshirë:
Korrupsion aktiv dhe pastrim parash;
Shkelje të barazisë në tendera dhe konkurrencë të paligjshme me dhunë;
Grup i strukturuar kriminal;
Heqje e paligjshme e lirisë.
Më 15 dhjetor 2025, Gjykata e Posaçme (GJKKO) caktoi ndaj tij masën e sigurisë “arrest në burg”, ndërsa pak ditë më vonë SPAK mundësoi shpalljen e tij në kërkim ndërkombëtar përmes një Red Notice të Interpolit.
Pasi siguroi informacione se Beqiri fshihej në territorin francez, SPAK kërkoi zyrtarisht ndihmën e autoriteteve atje më 19 qershor 2026. Përmes bashkëpunimit me Shërbimin e Sigurisë së Brendshme (SSI), Policinë Gjyqësore Franceze (DNPJ) dhe Zyrën Qendrore për Luftën kundër Krimit të Organizuar (OCLCO), u bë i mundur jo vetëm lokalizimi i tij, por edhe zbulimi i një pasurie marramendëse.
Asetet e identifikuara nga autoritetet franceze:
Llogari bankare: Më shumë se 2 milionë euro;
Kështjellë në Oise: Blerje me vlerë rreth 2.6 milionë euro;
Prona të tjera: Dy apartamente, mjetet motorike dhe asete të tjera luksoze.
SPAK ka dërguar tashmë një letërporosi (kërkesë për ndihmë juridike) te autoritetet franceze me qëllim sekuestrimin e menjëhershëm të këtyre pasurive, ndërsa hetimi financiar vazhdon për asete të tjera të mundshme.
Kapja e Ermal Beqirit më 24 korrik 2026 erdhi pas një incidenti të pazakontë ajror. Beqiri u vu në pranga pasi hyri me një avion të lehtë në hapësirën ajrore të kufizuar mbi centralin bërthamor të Penly-t, duke u detyruar më pas të ulej në aerodromin e Albert-it.
Pas arrestimit, gjykata franceze vendosi ta mbajë atë në paraburgim me qëllim ekstradimin. Në kuadër të kontrolleve të ushtruara në pronat e tij në Francë, u sekuestruan me cilësinë e provës materiale sende me interes të lartë për hetimin.
