Edhe një herë, presidenti amerikan Donald Trump është tërhequr nga një përshkallëzim i paralajmëruar i sulmeve amerikane ndaj Iranit.
Trump shkroi në rrjetin Truth Social se ushtria amerikane ishte “e armatosur, e gatshme dhe në pozicion” për të lëshuar “nivele të Terrorit Ushtarak, Forcës dhe Fuqisë që nuk janë parë që nga Lufta e Dytë Botërore”, por vendosi t’i anulonte sulmet pasi Teherani dhe vende të tjera të Lindjes së Mesme kërkuan që të “shtyhej çdo sulm”.
Analistët theksuan presionin ekonomik që lufta ka ushtruar mbi aleatët e SHBA-së në rajon si një nga arsyet pse ata dëshirojnë ndërprerjen e luftimeve. Ata vunë në dukje se edhe Irani përballet me të njëjtat vështirësi ekonomike, përveç faktit se ushtria e tij është dobësuar rëndë nga më shumë se pesë muaj luftë.
Megjithatë, ajo mbetet një forcë ushtarake që ende mund të godasë, siç u dëshmua nga sulmet vdekjeprurëse ndaj forcave amerikane në rajon gjatë muajit të kaluar.
Ndërkohë, ushtria amerikane po përballet me pyetje serioze lidhur me aftësinë e saj për t’i mbrojtur forcat amerikane, ndërsa rezervat e raketave për sistemet mbrojtëse Patriot dhe Terminal High Altitude Area Defense (THAAD) po shterojnë gjithnjë e më shumë, shkruan CNN.
Një raport i publikuar javën e kaluar nga Qendra për Studime Strategjike dhe Ndërkombëtare (CSIS) zbuloi se inventari amerikan i raketave interceptuese Patriot, sistemi kryesor mbrojtës raketor në arsenalin amerikan, ka rënë në rreth një të tretën e nivelit që kishte para luftës, nga 2.330 në mes 759 dhe 827 raketash deri më 27 korrik.
Sipas raportit të CSIS, raketat interceptuese THAAD, të projektuara për të goditur raketat balistike shumë përpara se ato t’u afrohen objektivave, kanë rënë nga 452 para luftës në 278 ose më pak aktualisht.
Shpenzimi i këtyre municioneve shoqërohet edhe me humbje të tjera të pajisjeve ushtarake, përfshirë avionë luftarakë, avionë për paralajmërim të hershëm ajror dhe zbulim, helikopterë dhe dronë.
Në det, asetet detare amerikane janë angazhuar në dislokime të zgjatura, gjë që mund të shtyjë mirëmbajtjen dhe riparimet e nevojshme.
“Për një ushtri të madhe, moderne dhe shumë të aftë si forca e përbashkët amerikane, ndikimet në gatishmërinë luftarake grumbullohen me kalimin e kohës, ndërsa kompromiset duhen bërë menjëherë”, shkroi në qershor Ariane Tabatabai, studiuese e lartë në Këshillin e Çikagos për Çështjet Globale.
Gati dy muaj më vonë, forca e përbashkët amerikane është shtrirë edhe më tej, duke ngritur pikëpyetje nëse ajo mund të japë një goditje vendimtare në këtë luftë.
Trita Parsi, bashkëthemelues dhe nënkryetar ekzekutiv i Institutit Quincy për Politika Shtetërore të Përgjegjshme, tha për CNN të dielën se Irani ka qenë në gjendje të vazhdojë të kundërpërgjigjet sa herë që SHBA-ja ka rritur presionin ushtarak – dhe ka të ngjarë ta bëjë këtë sërish.
“Përfundimi është ky: Trump nuk ka një rrugëdalje përmes përshkallëzimit nga ky konflikt”, tha Parsi.
