Një aheng familjar në Vushtrri u ndërpre nga ndërhyrja e Policisë, pasi raportimet për të shtëna me armë çuan në sekuestrimin e një arme dhe inicimin e procedurës penale ndaj një mysafiri.
Sinjali mëson se i dyshuari është Demokrat Ademi rreth 36-vjeçar.
Sipas burimeve, rasti ka ndodhur mbrëmjen e 1 gushtit, rreth orës 23:20, në rrugën “Aziz Bejta”, në fshatin Smrekonicë, ku Policia pranoi një njoftim përmes aplikacionit mobil se në një aheng familjar po dëgjoheshin të shtëna me armë.
Me të mbërritur në vendin e ngjarjes, zyrtarët policorë kanë kontaktuar me të dyshuarin, i cili ka deklaruar se ishte mysafir në aheng dhe ka pranuar se në brez mbante një armë me gaz, me të cilën kishte shtënë në ajër.
Gjatë veprimeve në vendin e ngjarjes, Policia ka sekuestruar një pistoletë me gaz, me tytë të shkurtër dhe ngjyrë të zezë, së bashku me një karikator pa fishekë, si dhe dy gëzhoja, të cilat dyshohet se janë shkrepur gjatë festës.
Me urdhër të Prokurorit të Shtetit, ndaj Demokrat Ademit është iniciuar procedurë për veprat penale “Kanosje”, “Përdorimi i armës apo mjetit të rrezikshëm” dhe “Mbajtja në pronësi, kontroll apo posedim të paautorizuar të armës”.
Pas intervistimit, i dyshuari është liruar në procedurë të rregullt, ndërsa hetimet për rastin janë në vazhdim.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
