Postimi i presidentit amerikan Donald Trump në Truth Social gjatë natës e bëri të qartë për Izraelin se nuk do të ketë sulme të menjëhershme ndaj Iranit, duke sinjalizuar në vend të kësaj një rund tjetër bisedimesh për të arritur një marrëveshje afatgjatë.
Dhe nuk është vetëm Irani ku SHBA-ja po ndjek në mënyrë aktive rrugën diplomatike.
Trump ka riinvestuar gjithashtu përpjekjet për të arritur përparim në Gaza – dhe kjo nënkupton ushtrimin e presionit ndaj Izraelit për t’i ndalur sulmet atje, shkruan CNN.
Enklava palestineze vazhdon të jetë objekt i sulmeve izraelite, pavarësisht se Trump njoftoi një përparim tri ditë më parë. Në një nga sulmet më të fundit, një familje prej tre anëtarësh u vra në një sulm pranë Qytetit të Gazës gjatë natës, i tha CNN-it drejtori i një spitali palestinez.
Hamasi ka deklaruar se është i përkushtuar ndaj çarmatimit, siç njoftoi Trump javën e kaluar, por vetëm nëse Izraeli ndalon zjarrin, mes kushteve të tjera.
“Orët në vijim do të jenë një provë e seriozitetit, jo e qëllimeve”, i tha CNN-it të shtunën në mbrëmje një zyrtar i lartë i Hamasit.
Zyrtari i Hamasit tha se Shtëpia e Bardhë kishte bërë “lëvizje të rëndësishme… gjatë orëve të fundit” për të çuar përpara marrëveshjen e armëpushimit të arritur pothuajse dhjetë muaj më parë.
Mohammed Dahlan, një ish-udhëheqës i Autoritetit Palestinez në Gaza, që tani jeton praktikisht në mërgim në Emiratet e Bashkuara Arabe, shkroi në Facebook se Jared Kushner, dhëndri i Trumpit, “po punon me palën izraelite për të ndalur sulmet në Gaza”.
Ndikimi më i gjerë i Dahlanit është i debatueshëm, por ai konsiderohet se ka ruajtur marrëdhënie të afërta me administrata të ndryshme amerikane ndër vite.
CNN ka kontaktuar Shtëpinë e Bardhë dhe Departamentin e Shtetit për koment.
Ndërsa Netanyahu nuk ka folur publikisht për zhvillimet në Gaza që nga njoftimi i Trumpit për premtimin e Hamasit për t’u çarmatosur, ministri izraelit i Energjisë, Eli Cohen, tha se nuk ka asnjë marrëveshje për ndalimin e sulmeve në Gaza dhe se ai e sheh të nevojshme që Izraeli, i cili tashmë kontrollon 70% të Rripit të Gazës, ta marrë nën kontroll të plotë të gjithë territorin, sipas komenteve të raportuara nga Reuters.
