Drejtori i Institutit të Kosovës për Drejtësi, Ehat Miftaraj, ka kritikuar ashpër kryesuesin e seancës konstituive, Avni Deharin, lidhur me mënyrën se si është menaxhuar procesi i konstituimit të Kuvendit të Kosovës. Miftaraj thotë se Dehari duhej ta shfrytëzonte pozitën e tij për respektimin e Kushtetutës, ndërsa pretendon se thirrja e seancës jashtë afatit kushtetues përbën shkelje të Kushtetutës dhe të aktgjykimeve të Gjykatës Kushtetuese.
Në një deklaratë për Gazeta Blic, Miftaraj ka thënë se Dehari, si deputeti më i vjetër dhe kryesues i seancës konstituive, do të duhej të kishte integritetin e nevojshëm për ta ushtruar këtë përgjegjësi në funksion të demokracisë, sundimit të ligjit dhe respektimit të institucioneve.“Avni Dehari, si kryesues i seancës, për shkak të kriterit se seanca konstituive udhëhiqet nga deputeti më i vjetër, do të duhej të kishte integritet personal dhe profesional që këtë privilegj ta zbatonte në dobi të demokracisë, sundimit të ligjit dhe, çka është më e rëndësishmja, të respektonte Kuvendin e Kosovës dhe qytetarët e vendit, duke thirrur seancën konstituive brenda afatit kushtetues”, ka deklaruar Miftaraj.
Ai ka kritikuar më tej Deharin, duke pretenduar se ky i fundit ka vepruar në interes të Lëvizjes Vetëvendosje dhe se thirrja e seancës jashtë afatit kushtetues përbën shkelje të Kushtetutës dhe të aktgjykimeve të Gjykatës Kushtetuese.“Avni Dehari, në mungesë të theksuar të integritetit personal, vendosi të bëhet mjet i LVV-së, duke thirrur seancën konstituive jashtë afatit kushtetues dhe duke shkelur me qëllim Kushtetutën e Kosovës dhe aktgjykimet e Gjykatës Kushtetuese”, është shprehur ai.
Sipas Miftarajt, kjo situatë ka ndikuar edhe në legjitimitetin e deputetëve të legjislaturës së re, të cilët, sipas tij, po e fillojnë punën me shkelje kushtetuese.“Avni Dehari dhe LVV-ja, me këtë veprim, delegjitimuan 120 deputetët e Kuvendit të Kosovës, të cilët legjislaturën e 11-të të Kuvendit të Kosovës e fillojnë me shkelje kushtetuese. Së paku 53 deputetë nga LVV-ja e bëjnë këtë me vullnetin e tyre, ndërsa pjesa tjetër sepse këtë ua imponon LVV-ja përmes Avni Deharit”, ka thënë Miftaraj.
Megjithatë, pavarësisht se afati kushtetues tashmë është tejkaluar, IKD-ja u bën thirrje deputetëve të marrin pjesë në procesin e konstituimit të Kuvendit, pasi, sipas Miftarajt, nuk ekziston një rrugë tjetër procedurale për të dalë nga situata e krijuar.“Edhe pse jashtë afatit kushtetues, IKD-ja fton deputetët e partive politike të marrin pjesë sot në konstituimin e Kuvendit, pasi nuk ka rrugë tjetër procedurale përveç konstituimit, edhe në shkelje kushtetuese, pas kalimit të afatit prej 30 ditësh. Kjo situatë është krijuar për fajin e plotë të LVV-së”, ka deklaruar ai.
Miftaraj është ndalur edhe te qëndrimet e Gjykatës Kushtetuese, duke theksuar se kjo gjykatë tashmë ka nxjerrë dy aktgjykime lidhur me konstituimin e Kuvendit.“Gjykata Kushtetuese ka vendosur dhe ka publikuar dy aktgjykime lidhur me konstituimin e Kuvendit. Edhe sikur të shkojë një lëndë e re në këtë Gjykatë, e njëjta nuk mund të dalë jashtë asaj që ka përcaktuar dy herë më parë”, u shpreh Miftaraj.
Ai theksoi se afati prej 30 ditësh është detyrues dhe se brenda këtij afati Kuvendi duhej të ishte konstituuar.“Afati prej 30 ditësh, sipas Gjykatës Kushtetuese, është detyrues dhe brenda tij Kuvendi duhet të konstituohet”, tha drejtori i IKD-së.
Miftaraj ka rikujtuar gjithashtu se aktgjykimet e Gjykatës Kushtetuese janë përfundimtare dhe detyruese për institucionet dhe deputetët.“Të gjitha institucionet dhe deputetët janë të detyruar t’i zbatojnë aktgjykimet e Gjykatës Kushtetuese, sepse ato janë përfundimtare dhe detyruese”, deklaroi ai.
Në fund, Miftaraj ka folur për pasojat e mosrespektimit të afatit 30-ditor, duke iu referuar konstatimeve të Gjykatës Kushtetuese lidhur me zbatimin e aktgjykimeve të saj.“Kur afati 30-ditor nuk u respektua, Gjykata konstatoi se aktgjykimi i saj nuk ishte zbatuar dhe se Kuvendi nuk ishte konstituuar sipas Kushtetutës. Megjithatë, Gjykata njëjtë ka konstatuar se nuk ka pasojë juridike nëse deputetët vendosin ta shkelin Kushtetutën”, ka përfunduar Miftaraj.
