Më shumë se 1 milion njerëz janë evakuuar nga shtëpitë e tyre në lindje të Kinës, përfshirë edhe qytetin e Shangait, pasi tajfuni “Dolphin” goditi vendin me reshje të dendura dhe erëra të forta.
Stuhia shkaktoi probleme të mëdha në transport. Vetëm në Shangai, rreth 1 mijë fluturime u anuluan të hënën, ndërsa disa linja transporti u pezulluan.
Autoritetet kineze e kanë ulur nivelin e “Dolphin” nga tajfun në stuhi tropikale, por paralajmërojnë se reshjet e dendura, përmbytjet dhe rrëshqitjet e dheut do të vazhdojnë deri të mërkurën, ndërsa stuhia lëviz drejt veriut. Më herët, Kina kishte dhënë alarmin më të lartë të kuq për stuhinë, e cila konsiderohet më e forta që ka goditur vendin këtë vit.
“Dolphin” arriti në tokë për herë të parë të dielën në orën 17:30 me kohën lokale, pranë qytetit Yuhuan në provincën Zhejiang. Në atë moment, erërat arrinin deri në 150 kilometra në orë. Rreth një orë më vonë, stuhia goditi përsëri tokën pranë qytetit Wenzhou.
Meteorologët kanë parashikuar reshje të mëdha në disa provinca, përfshirë Shandong, Henan, Hubei, Anhui, Jiangsu dhe Zhejiang, si dhe në Shangai. Në disa zona të Zhejiang priten deri në 500 milimetra shi gjatë ditëve në vijim.
Autoritetet u kanë kërkuar banorëve të shmangin daljet nga shtëpitë. Disa nga atraksionet turistike më të njohura janë mbyllur përkohësisht, përfshirë pjesë të Disneyland dhe Legoland, si dhe disa pika panoramike përgjatë Bund-it në Shangai.
Pamjet e publikuara nga mediat shtetërore tregojnë dyqane të përmbytura në katet përdhese në zonën e ish-Koncesionit Francez në Shangai, ndërsa banorë dhe turistë shihen duke lëvizur nëpër ujë.
Sipas mediave kineze, një djalë 9-vjeçar nga Wenling, në provincën Zhejiang, rezulton i zhdukur pasi u tërhoq nga dallgët në det. Deri tani, autoritetet nuk kanë raportuar viktima nga stuhia në Kinë.
Në Wenzhou, rreth 900 mijë njerëz janë zhvendosur në zona më të sigurta dhe janë hapur mbi 1 mijë qendra emergjence. Në qytetin Taizhou janë evakuuar rreth 390 mijë persona. Në provincën bregdetare Fujian janë pezulluar dhjetëra linja tragetesh, ndërsa janë ndalur më shumë se 100 projekte ndërtimi në det të hapur.
Sipas televizionit shtetëror CCTV, stuhia ka përshkuar rreth 6 mijë kilometra para se të mbërrinte në Kinë. Kjo ka bërë që “Dolphin” të ketë një jetëgjatësi shumë më të madhe se një tajfun i zakonshëm. Stuhia ka gjithashtu një përmasë të madhe dhe sjell sasi të konsiderueshme reshjesh.
Përhapje e lajmeve të rreme
Përveç motit të keq, autoritetet kineze po përballen edhe me përhapjen e informacioneve të rreme në internet.
Dy persona janë ndaluar pasi dyshohet se kanë publikuar materiale mashtruese lidhur me tajfunin. Njëri prej tyre, një 60-vjeçar, kishte krijuar me inteligjencë artificiale një video të rreme ku pretendohej se një person kishte rënë nga një ndërtesë në Shangai gjatë stuhisë.
Një tjetër person, 32 vjeç, kishte modifikuar pamje të tajfunit të publikuara më parë në rrjetet sociale, duke krijuar një version që autoritetet e konsideruan mashtrues.
Stuhia shkaktoi probleme edhe në vende të tjera
Para se të godiste Kinën, “Dolphin” solli reshje të dendura në Filipine, pjesë të Tajvanit verior dhe ishullin japonez Okinawa.
Në Filipine, tetë persona kanë humbur jetën nga reshjet e fuqishme të lidhura me “Dolphin” dhe stuhi të tjera. Më shumë se 7 mijë njerëz ndodhen në qendrat e evakuimit. Në Okinawa, pesë persona të moshuar kanë pësuar lëndime të lehta për shkak të motit të keq. Tre prej tyre u rrëzuan si pasojë e erërave të forta.
Ndërkohë, në Hong Kong, temperatura arriti një rekord prej 36.9 gradësh Celsius të dielën, pasi tajfuni solli masa ajri të ngrohtë mbi qytet. Sezoni i tajfuneve në Paqësorin perëndimor zakonisht zgjat nga maji deri në tetor. Ekspertët thonë se fenomeni El Niño mund të ndikojë në fuqinë e tajfuneve dhe t’i bëjë disa prej tyre më intensive.
