Vetëvendosje, përveç Kushtetutës dhe Aktgjykimit të Gjykatës Kushtetuese, ka shkelur edhe Rregulloren e Kuvendit, duke mos e vazhduar seancën konstituive brenda afatit prej 48 orësh, siç përcaktohet në Rregulloren e Kuvendit.
Neni 12, paragrafi 5 i Rregullores përcakton se ndërprerjet gjatë seancës konstituive nuk mund të jenë më të gjata se 48 orë.
Megjithatë, edhe pas kalimit të këtij afati, seanca nuk është thirrur për vazhdim.
Kjo vjen pasi tashmë ka skaduar edhe afati kushtetues prej 30 ditësh për konstituimin e Kuvendit, i përcaktuar nga Gjykata Kushtetuese në Aktgjykimin KO124/25.
Gjykata Kushtetuese ka sqaruar se 30-ditëshi pas certifikimit të rezultateve zgjedhore është afati brenda të cilit duhet të konstituohet Kuvendi, dhe jo vetëm afati brenda të cilit duhet të nisë procedura e konstituimit.
Megjithatë, zyrtarët e Vetëvendosjes vazhdojnë të pretendojnë se nuk është shkelur Kushtetuta.
Ushtruesja e detyrës së presidentes, Albulena Haxhiu, tha sot se nëse dikush konsideron se Kushtetuta është shkelur, duhet t’i drejtohet Gjykatës Kushtetuese.
“Lirisht le t’i drejtohen Gjykatës Kushtetuese”, deklaroi Haxhiu.
Edhe Glauk Konjufca ka insistuar se nuk ka shkelje kushtetuese dhe se çështja duhet të adresohet në Gjykatën Kushtetuese.
Kështu, Vetëvendosje i ka bërë thirrje opozitës që ta dërgojë çështjen në Gjykatën Kushtetuese, ndonëse ekziston tashmë një aktgjykim i kësaj gjykate që përcakton qartë se 30 ditët nga certifikimi i rezultateve janë afati brenda të cilit duhet të përfundojë konstituimi i Kuvendit.
Pavarësisht këtij përcaktimi, Kuvendi nuk është konstituuar brenda afatit kushtetues, ndërsa tani ka kaluar edhe afati 48-orësh i paraparë për ndërprerjen e seancës konstituive.
