Prokuroria Themelore në Prishtinë, ka ngritur aktakuzë ndaj pesë personave pas përfundimit të hetimeve për zjarrvënien në diskotekën ‘’Gate Club’’ dhe për një tjetër incident hakmarrjeje. Përmes kësaj aktakuze, organi i akuzës bën të ditur se dëmi i përgjithshëm material i shkaktuar nga këto veprime kriminale kap vlerën e pothuajse një milion eurove.
Sipas dosjes së prokurorisë, më 14 shkurt të vitit 2025, rreth orës 04:53, në rrugën ‘’Epiri’’ përgjatë zonës industriale Prishtinë-Fushë Kosovë të pandehurit SH.T. dhe F.S., në bashkëkryerje dhe me dashje, i kanë vënë zjarrin objektit të diskotekës ‘’Gate Club’’. Ky veprim kriminal pretendohet se është kryer pas shtytjes nga i pandehuri RR.A., i cili u kishte premtuar një shpërblim prej 3.000 eurosh. Si pasojë e kësaj zjarrvënieje, pronarëve të dëmtuar u është shkaktuar një dëm i madh material prej 969.435 eurosh.
Hetimet kanë zbuluar gjithashtu se zjarri në diskotekë nxiti një tjetër akt kriminal disa muaj më vonë. Përgjatë periudhës kohore nga muaji shtator deri më 16 nëntor 2025, të pandehurit B.H. dhe I.M., duke vepruar në marrëveshje edhe me persona të tjerë, kanë shtyrë me dashje një person ende të paidentifikuar për t’u hakmarrë ndaj të dëmtuarit me inicialet S.S. Ata konsideronin se arrestimi i SH.T. dhe F.S. kishte ardhur si rezultat i veprimeve të këtij të fundit.
Si rrjedhojë e kësaj shtytjeje, personi i paidentifikuar i ka vënë zjarrin automjetit të llojit ‘’Range Rover’’ në pronësi të S.S., duke i shkaktuar atij një dëm material prej 54.892,72 eurosh. Për të gjitha këto veprime, Prokuroria ngarkon SH.T. dhe F.S. për veprën penale ‘’Zjarrvënia’’, ndërsa B.H., I.M. dhe RR.A. akuzohen për ‘’Shtytje nga zjarrvënia’’. Veç kësaj, i pandehuri F.S. do të përballet edhe me akuzën për ‘’Pengim të të provuarit apo procedurës zyrtare’’.
