Emri i Erling Haaland është lidhur prej kohësh me Real Madridin, veçanërisht që nga periudha kur sulmuesi norvegjez shkëlqente me Borussia Dortmundin, përpara transferimit te Manchester City.
Megjithatë, sipas ish-futbollistit të Real Madridit, Michael Owen, një transferim i Haalandit në “Santiago Bernabéu” do të ishte shumë i vështirë për sa kohë në skuadër është Kylian Mbappé.
Sipas Owen, Real Madridi tashmë po përballet me sfidën për të gjetur balancën ideale mes Mbappé dhe Vinícius Júnior, ndërsa afrimi i Haalandit do ta komplikonte edhe më shumë situatën.
“Nuk i shoh Mbappé dhe Haaland në të njëjtën skuadër”
Duke folur në një intervistë për Skinradar, të transmetuar nga Defensa Central, Owen u shpreh se nuk beson që Real Madridi do të investojë një shumë të madhe për Haalandin pa realizuar më parë një largim të rëndësishëm.
“Për sa kohë Mbappé është aty, nuk i shoh duke shpenzuar aq shumë para për Haalandin. Tashmë ka njerëz që pyesin nëse Vinícius dhe Mbappé mund të luajnë së bashku, sepse Mbappé preferon të pozicionohet pak më shumë në krahun e majtë”, tha Owen.
Sipas tij, pyetja do të bëhej edhe më e vështirë nëse në skuadër do të ishin njëkohësisht Mbappé dhe Haaland.
“Nëse dyshja do të ishte Mbappé dhe Haaland, si do të luanin së bashku? A do ta zhvendosje Mbappé në të majtë? Mendoj se, sinqerisht, duhet të jetë njëri ose tjetri.”
“Mbappé do të detyrohej të largohej”
Owen beson se dy prej sulmuesve më të mirë në botë nuk do të ishte e lehtë të bashkëjetonin në të njëjtën skuadër, si për arsye taktike, ashtu edhe financiare.
“Nuk mendoj se mund t’i kesh dy prej sulmuesve më të mirë të pastër në botë, Mbappé dhe Haaland, në të njëjtën skuadër. Personalisht, nuk besoj se mund të jenë pjesë e të njëjtit ekip”, deklaroi ish-sulmuesi anglez.
Ai shtoi se për të realizuar një operacion të tillë, Real Madridi me shumë gjasë do të duhej të sakrifikonte Mbappé.
“Është çështje kostoje dhe më pas duhet të gjesh mënyrën që gjithçka të funksionojë. Që kjo të ndodhë, mendoj se Mbappé do të detyrohej të largohej.”
Owen kujton epokën e “Galácticos”
Ish-fituesi i Topit të Artë kujtoi edhe periudhën e “Galácticos”, kur Real Madridi mblodhi në të njëjtën skuadër disa prej yjeve më të mëdhenj të futbollit botëror.
“Ata e provuan idenë e Galácticos shumë vite më parë, në gjeneratën time. Thjesht të mbledhësh lojtarët më të mëdhenj nuk do të thotë domosdoshmërisht se ke gjetur zgjidhjen perfekte”, tha Owen.
Pavarësisht rezervave të tij për një dyshe të mundshme Mbappé–Haaland, Owen theksoi se vazhdon të ketë admirim dhe respekt të madh për Real Madridin.
Sipas tij, nëse klubi spanjoll vendos një ditë të bëjë një lëvizje serioze për Haalandin, çështja kryesore nuk do të jetë vetëm çmimi i norvegjezit, por edhe mënyra se si do të ristrukturohej sulmi i skuadrës.
