Kryesia e Partisë Demokratike të Kosovës (PDK) ka mbajtur mbledhjen e radhës, ku ka diskutuar zhvillimet e fundit politike në vend dhe hapat e ardhshëm të partisë.
Gjatë mbledhjes, Kryesia e PDK-së i ka shprehur mirënjohje Grupit Parlamentar të PDK-së për angazhimin në mbrojtje të Kushtetutës, rendit juridik dhe vlerave demokratike në Kosovë.
PDK-ja ka vlerësuar se janë evidente shkeljet e Kushtetutës, vendimeve të Gjykatës Kushtetuese dhe Rregullores së Punës së Kuvendit të Kosovës. Sipas Kryesisë, këto zhvillime përbëjnë cenim të themeleve të Kosovës si shtet demokratik dhe parlamentar.
Kryetari i PDK-së, Bedri Hamza, ka deklaruar se mbrojtja e Kushtetutës, institucioneve dhe rendit demokratik mbetet përgjegjësi e përbashkët.
“Mbrojtja e Kushtetutës, institucioneve dhe rendit demokratik mbetet përgjegjësi e përbashkët. PDK-ja është e vendosur në përmbushjen e këtij obligimi”, ka theksuar Hamza.
Kryesia e PDK-së ka bërë të ditur se do të vazhdojë t’i përcjellë nga afër zhvillimet politike në vend dhe, sipas nevojës, do të ndërmarrë veprimet e duhura për mbrojtjen e kushtetutshmërisë, demokracisë dhe parlamentarizmit në Kosovë.
