Avokati i gazetarit Lirim Mehmetaj, Arianit Koci, ka njoftuar se do ta paraqesë në Policinë e Kosovës rastin e një videoje të manipuluar, e cila sipas tij është shpërndarë në rrjetet sociale me qëllim të dëmtimit të reputacionit të klientit të tij.
Koci ka deklaruar se videoja origjinale ishte publikuar rreth një vit më parë dhe kishte të bënte me një adresë të paraqitur si seli qendrore e partisë Guxo. Sipas tij, videoja tash është përpunuar me efekte dhe është publikuar në një formë që krijon përshtypjen se Lirim Mehmetaj po përdor substanca narkotike.
Avokati e ka cilësuar këtë pretendim si të pavërtetë, duke thënë se një situatë e tillë nuk ka ndodhur dhe se montazhi përbën përpjekje për dëmtimin e karakterit dhe integritetit personal e profesional të gazetarit.
Koci ka paralajmëruar se personat që, sipas tij, janë përfshirë në këtë rast tashmë janë identifikuar dhe se provat do t’i dorëzohen Policisë së Kosovës. Ai ka kërkuar gjithashtu që roli dhe veprimet e secilit person të hetohen deri në fund.
Në anën tjetër, vetë Lirim Mehmetaj ka reaguar lidhur me videon, duke thënë se Vetëvendosja sipas tij është marrë më herët me manipulime të videove dhe fotografive të tij. Mehmetaj ka deklaruar se zakonisht i ka lënë pa reagim raste të tilla, duke kërkuar nga publiku që të shohë videon e plotë për të kuptuar të vërtetën.
Megjithatë, ai ka thënë se këtë herë do ta ndjekë çështjen deri në fund, duke e cilësuar montazhin e fundit si një manipulim që ka kaluar çdo kufi.
Rasti pritet të marrë tash edhe rrugë institucionale, pas paralajmërimit të avokatit Koci se çështja do t’i dorëzohet Policisë së Kosovës për hetim.
