Kompania e biznesmenit Agron Xhaferi po merr në shfrytëzim për 99 vjet 342 metra katrorë pronë komunale në Gjilan, për ta kompletuar parcelën ku planifikohet ndërtimi i një kompleksi afaristo-banesor mbi 25 milionë euro. Në dokumentet që i paraprinë projektit figuron Shkëlqim Latifi, vëllai i kryesueses së Kuvendit Komunal, Krenare Latifi-Kqiku, e cila thotë se ai nuk është pronar apo aksionar i kompanisë, por ka kryer shërbime teknike për të. Kryesuesja pretendon se procedurat kanë qenë në përputhje me ligjin dhe se Komuna do të kompensohet me 30 për qind të sipërfaqes neto të objektit
Një biznesmen do të realizojë një projekt afaristo-banesor me vlerë mbi 25 milionë euro në Gjilan, ndërsa për kompletimin e parcelave ndërtimore do të shfrytëzojë edhe pronë komunale të dhënë në shfrytëzim për 99 vjet.
Bëhet fjalë për kompaninë “BOC INT” Sh.P.K., në pronësi të Agron Xhaferit, për të cilën Kuvendi Komunal i Gjilanit ka miratuar dhënien në shfrytëzim të tri pjesëve të parcelave komunale, me një sipërfaqe të përgjithshme prej rreth 342 metrash katrorë.
Këto prona lidhen me projektin e kompleksit “Vera”, i planifikuar të ndërtohet në rrugën “Nëna Tereza”, ish-Rruga e Prishtinës.
Por, në dokumentet që i kanë paraprirë këtij projekti të cilat i ka siguruar Insajderi, shfaqet edhe emri i Shkëlqim Latifit.
Ai figuron si aplikues në procedurën e parcelimit të lidhur me projektin, ndërsa kryesuesja e Kuvendit Komunal të Gjilanit, Krenare Latifi-Kqiku, ka konfirmuar se Shkëlqim Latifi është vëllai i saj.
Vëllai i Kryesueses figuron në dokumentet e projektit
Lënda për parcelim, është një nga dokumentet që i paraprinë procedurës për kompletimin e parcelave ndërtimore.
Në këtë dokument, si aplikues figuron Shkëlqim Latifi.
Prania e emrit të tij në një procedurë që lidhet me projektin e kompanisë “BOC INT” Sh.P.K. ngre pikëpyetje për rolin e tij në këtë proces, veçanërisht duke pasur parasysh lidhjen familjare me personin që drejton Kuvendin Komunal, organin që ka votuar për dhënien e pronës.
Gazeta Insajderi e ka pyetur kryesuesen Krenare Latifi-Kqiku për rolin e vëllait të saj dhe për raportin e tij me kompaninë përfituese.
Ajo e ka pranuar lidhjen familjare.
“Sa i përket a është i afërm i imi, po, është vëllai im”, ka thënë Latifi-Kqiku.
Megjithatë, ajo ka mohuar se vëllai i saj ka ndonjë pronësi në kompaninë që përfiton nga dhënia në shfrytëzim e pronës komunale.
Sipas saj, Shkëlqim Latifi ka qenë vetëm person i autorizuar për kryerjen e shërbimeve teknike.
“Shkëlqim Latifi ka qenë person i autorizuar për të kryer shërbime, por në asnjë mënyrë nuk është pronar i kompanisë apo aksionar”, ka deklaruar ajo.
Kryesuesja ka thënë gjithashtu se angazhimi i vëllait të saj në këtë kompani ka nisur në vitin 2023.
Sipas saj, kjo ka ndodhur para se ajo të merrte pozitën e kryesueses së Kuvendit Komunal të Gjilanit.
“Për më shumë, ky angazhim i vëllait për ta ndihmuar kompaninë me kryerjen e shërbimeve teknike ka filluar nga viti 2023, atëherë kur unë s’kam qenë kryesuese”, ka thënë Latifi-Kqiku.
Kompania në pronësi të Agron Xhaferit
Përfitues i marrëveshjes me Komunën është kompania “BOC INT” Sh.P.K., pronar i së cilës, sipas dokumenteve dhe përgjigjes së kryesueses, është Agron Xhaferi.
Kryesuesja ka thënë se për pronësinë e kompanisë mund të konsultohen dokumentet noteriale dhe dokumentet e dorëzuara në institucionet komunale.
Ajo ka përmendur se të dhënat mund të verifikohen edhe në drejtoritë komunale, përfshirë Kadastrin, Urbanizmin dhe Shërbimet Publike, si dhe në institucione e ndërmarrje të tjera ku është kërkuar dokumentacion për projektin.
“Pronar i kompanisë është Agron Xhaferi. Mund t’u referoheni dokumenteve noteriale të paraqitura në zyrën e Kryetarit, drejtoritë si Kadastri, Urbanizmi, Shërbimet Publike, por edhe KEK, Hidromoravë, Higjienë, Polici etj., gjithkund ku ka pasur nevojë”, ka thënë ajo.
Kështu, sipas versionit të kryesueses, Shkëlqim Latifi nuk është përfituesi apo pronari i kompanisë, por person i autorizuar për të kryer shërbime për të.
342 metra katrorë të Komunës për një projekt prej mbi 25 milionë eurosh
Dokumentet e procedurës tregojnë se projekti është i përmasave të mëdha. Parashihet ndërtimi i katër lamelave, me mbi 44 mijë metra katrorë sipërfaqe ndërtimore.
Sipas propozimit të Kryetarit të Komunës së Gjilanit, Alban Hyseni, bëhet fjalë për tri pjesë të parcelave komunale që janë futur në këtë marrëveshje.
E para është një pjesë prej 60 metrash katrorë e ngastrës kadastrale P-70403013-04781-1, e cila në tërësi ka 9,021 metra katrorë.
E dyta është një pjesë prej 132 metrash katrorë e ngastrës P-70403013-04406-0, e cila në tërësi ka 733 metra katrorë.
Ndërsa pjesa e tretë është prej 150 metrash katrorë e ngastrës P-70403013-04349-1, e cila në tërësi ka 300 metra katrorë.
Në total, bëhet fjalë për 342 metra katrorë pronë komunale.
Dokumenti i Komunës sqaron se këto sipërfaqe nevojiten për kompletimin e truallit dhe parcelës ndërtimore për realizimin e kompleksit afaristo-banesor “Vera”.
Komuna do të marrë 30 për qind të objektit
Në marrëveshjen e miratuar është paraparë që Komuna e Gjilanit të kompensohet me 30 për qind të sipërfaqes neto të objektit.
Në këtë përllogaritje nuk përfshihen muret dhe hapësirat e përbashkëta.
Kryesuesja e Kuvendit Komunal ka deklaruar se banesat që do t’i marrë Komuna si pjesë e kompensimit do të përdoren për nevoja publike.
“Në përputhje me Planin Zhvillimor të Komunës, interesat e Komunës dhe interesat e banorëve, më saktë komuniteti i cili e ka dhënë pronën në shfrytëzim, Komuna e ka parë si interes që të këmbëjë ose të japë në shfrytëzim këto tri parcela që lidhen me kompleksin banesor dhe Komuna do të përfitojë 30%”, ka thënë ajo.
Sipas saj, banesat e përfituara nga Komuna do të shfrytëzohen për interesa publike.
Vendimi ishte kthyer më herët në procedurë
Sipas kryesueses Latifi-Kqiku, vendimi i fundit nuk është hera e parë që kjo çështje është proceduar në Kuvendin Komunal.
Ajo ka sqaruar se një vendim i mëhershëm ishte trajtuar pas kërkesës së Ministrisë së Pushtetit Lokal.
Sipas saj, Ministria kishte kërkuar që prona të shpallej në faqen zyrtare si interes publik për Komunën.
Pas përfundimit të afateve ligjore, sipas kryesueses, çështja është rikthyer në Kuvend për vendimmarrje.
“Për sqarim, ky është vendimi i dytë që kalon në Kuvend. Vitin e kaluar, me kërkesën e Ministrisë së Pushtetit Lokal, kanë kërkuar që prona të shpallet në faqen zyrtare si interes publik për Komunën dhe, pas të gjitha afateve ligjore, e kemi sjellë prapë në Kuvend”, ka deklaruar ajo.
Ajo këmbëngul se gjatë gjithë procedurës janë respektuar hapat e paraparë me ligj.
“Nuk paraqet konflikt interesi”
Çështja e lidhjes familjare është një nga pikat për të cilat Gazeta Insajderi ka kërkuar sqarime nga kryesuesja e Kuvendit.
Latifi-Kqiku e ka pranuar se personi që figuron në dokumentet e parcelimit është vëllai i saj, por ka argumentuar se kjo, sipas saj, nuk paraqet konflikt interesi, pasi ai nuk është pronar apo aksionar i kompanisë.
“Po, është vëllai im, por nuk paraqet konflikt interesi, sepse nuk është pronar i kompanisë”, ka thënë ajo.
Ajo është mbështetur edhe në faktin se angazhimi i tij me kompaninë ka nisur para se ajo të merrte pozitën e kryesueses.
Megjithatë, emri i tij figuron në një dokument të rëndësishëm të procedurës, atë të parcelimit, ndërsa kompania për të cilën ai ka kryer shërbime është pikërisht ajo që tashmë përfiton nga dhënia në shfrytëzim e pronës komunale.
Komuna thotë se prona publike do ta rrisë vlerën
Në arsyetimin e vendimit, Komuna e Gjilanit thotë se përfshirja e pronës komunale në projekt bëhet në funksion të shfrytëzimit të saj sipas planifikimit hapësinor dhe ruajtjes e rritjes së vlerës së pronës publike.
Sipas këtij arsyetimi, me lejimin e ndërtimit edhe në këto pjesë të parcelave komunale, Komuna do të kompensohet me sipërfaqe të krijuar në ndërtesën e re, sipas kushteve të ndërtimit dhe lejes ndërtimore.
“Me lejimin e ndërtimit në këto pjesë të parcelave komunale, komuna do të kompenzohet me sipërfaqen e krijuar në ndërtesën e re sipas kushteve të ndërtimit dhe lejës ndërtimore dhe do të rritet vlera e pronës komunale në këtë zonë të ndërtimit”.
Në dokument thuhet se në këtë mënyrë do të rritet edhe vlera e pronës komunale në këtë zonë.
Kjo është baza mbi të cilën Komuna e ka propozuar dhënien në shfrytëzim të tri pjesëve të parcelave.
Sipas vendimit të miratuar, ai hyn në fuqi 30 ditë pas regjistrimit në zyrën e protokollit të Ministrisë së Administrimit të Pushtetit Lokal dhe publikimit në gjuhët zyrtare në ueb-faqen e Komunës./Insajderi.org/
