Ministri i Punëve të Jashtme dhe Diasporës, Glauk Konjufca, ka reaguar ndaj deklaratave të zyrtarëve serbë për Kosovën, duke vlerësuar se ato dëshmojnë vazhdimësinë e ambicieve territoriale të Beogradit ndaj Republikës së Kosovës.
Në një postim, Konjufca ka përmendur deklaratën e Ivica Daçiqit, i cili gjatë një tubimi zgjedhor në Serbi ka thënë se flamuri serb “herët a vonë do të valëvitet mbi Prizren”, transmeton IndeksOnline.
Sipas Konjufcës, deklarata të tilla dëshmojnë se ambiciet territoriale të Serbisë ndaj Kosovës nuk janë çështje e së kaluarës.
Ai ka përmendur edhe paraqitjen publike të Milan Radoiçiqit në tubimin e partisë së presidentit serb, Aleksandar Vuçiq, në Kragujevc, ku, sipas tij, ishte i pranishëm edhe Danilo Vuçiq, djali i presidentit serb.
“Serbia nuk mund të pretendojë se synon paqen dhe integrimin evropian, ndërkohë që zyrtarët e saj të lartë sfidojnë hapur sovranitetin e Republikës së Kosovës dhe organizatori i pranuar i sulmit vdekjeprurës terrorist në Banjskë mbetet i lirë, duke u shfaqur publikisht krah familjes së presidentit në vend që të përballet me drejtësinë” shkroi Konjufca.
Ky është postimi i plotë i tij:
Ambiciet e ripërtërira territoriale të Serbisë ndaj Republikës së Kosovës u shfaqën hapur edhe një herë këtë javë, kur zëvendëskryeministri i saj, Ivica Daçiq, deklaroi në një tubim zgjedhor se flamuri serb “herët a vonë do të valëvitet mbi Prizren”, një qytet në jug të Kosovës. Një retorikë e tillë dëshmon se ambiciet territoriale të Beogradit janë larg së qenit një çështje e së kaluarës.
Vetëm dy ditë më vonë, Milan Radoiçiq – i cili kërkohet nga Interpoli për shkak të sulmit terrorist në Banjskë që ai e organizoi – u shfaq krah Danilo Vuçiqit në tubimin e partisë së Aleksandar Vuçiqit në Kragujevc; aty, Vuçiqi kërcënoi sërish pavarësinë e Republikës së Kosovës.
Këto nuk janë provokime të izoluara. Ato nxjerrin në pah vazhdimësinë e një doktrine të rrezikshme politike: ekspansionizmin territorial në retorikë dhe pandëshkueshmërinë për agresion të armatosur në praktikë.
Serbia nuk mund të pretendojë se synon paqen dhe integrimin evropian, ndërkohë që zyrtarët e saj të lartë sfidojnë hapur sovranitetin e Republikës së Kosovës dhe organizatori i pranuar i sulmit vdekjeprurës terrorist në Banjskë mbetet i lirë, duke u shfaqur publikisht krah familjes së presidentit në vend që të përballet me drejtësinë.
Komuniteti ndërkombëtar duhet t’i dënojë pa mëdyshje këto veprime dhe të kërkojë llogaridhënie. Sovraniteti i Republikës së Kosovës nuk është i negociueshëm, e po ashtu as drejtësia për sulmin terrorist në Banjskë.
