Qeveria e Turqisë ka ndaluar zyrtarisht qasjen e fëmijëve nën moshën 15 vjeç në platformat e rrjeteve sociale, me ligjin e ri që do të hyjë në fuqi më 1 nëntor.
Ligji u publikua të shtunën, pas miratimit të projektligjit nga Parlamenti turk në prillin e kaluar.
Sipas dispozitave të reja, platformat e rrjeteve sociale do të obligohen të zbatojnë masa teknike dhe administrative për verifikimin e moshës së përdoruesve, në mënyrë që të sigurohet zbatimi i ndalimit.
Ligji parasheh gjithashtu kufizime për të miturit mbi moshën 15-vjeçare, duke ndaluar ofrimin e shërbimeve që mund të kenë efekt krijues varësie.
Turqia ka vendosur vazhdimisht kufizime ndaj platformave online. Në vitin 2024, autoritetet turke bllokuan Instagramin për një javë, mes pretendimeve se platforma në pronësi të kompanisë Meta censuronte përmbajtje që lidhej me vdekjen e liderit të Hamasit, Ismail Haniyeh.
Javën e kaluar, autoritetet bllokuan një faqe lajmesh dhe llogaritë e saj në rrjetet sociale, për shkak të asaj që një gjykatë e cilësoi si “propagandë LGBT”. Vendimi nxiti reagime nga organizatat për të drejtat e njeriut dhe lirinë e medias.
Ndërkohë, sipas një raporti të vitit 2025 të organizatës Freedom House, interneti në Turqi vlerësohet si “jo i lirë”.
Me këtë vendim, Turqia i bashkohet një numri në rritje të shteteve që po vendosin kufizime për përdorimin e rrjeteve sociale nga fëmijët. Australia dhe Indonezia janë ndër vendet që kanë ndërmarrë ose po shqyrtojnë masa të ngjashme.
Edhe disa shtete evropiane, përfshirë Austrinë, Danimarkën, Francën, Greqinë dhe Spanjën, po shqyrtojnë ligje për kufizimin e qasjes së fëmijëve në këto platforma. Bashkimi Evropian ka paraqitur gjithashtu një propozim për kufizimin e përdorimit të rrjeteve sociale dhe platformave të videove nga fëmijët nën 15 vjeç, ndërsa Kanadaja ka propozuar kufizime për personat nën moshën 16-vjeçare.
