Një ngjarje skandaloze ka ndodhur në ambulancën e stomatologjisë “AL – Dent V” në Skenderaj, ku gjatë procedurës së trajtimit të dhëmbit pacienti e ka gëlltitur gjilpërën endodontike.
Ky rast i ka ndodhur pacientit G.A. (emër i njohur për redaksinë) më 28 janar 2026 gjatë trajtimit stomatologjik nga Dr. Ismet Uka në një ambulancë stomatologjike, e cila nuk figuronte e regjistruar në sistemin elektronik të Ministrisë së Shëndetësisë.
Veriu.info ka siguruar raportimin e inspektimit të inspektorëve shëndetësorë të realizuar një ditë pas kësaj ngjarje të rëndë për shëndetin e pacientit me kërkesë të Policisë së Kosovës, ku thuhet se pacienti aksidentalisht ka gëlltitur gjilpërën endodontike.
“Gjatë shikimit të RTG (Rentgenit), pacienti aksidentalisht e ka gëlltitur gjilpërën endodontike”, citohet në raport të ketë thënë Dr. Ismet Uka para inspektorëve shëndetësorë.
Në raport të inspektimit si shkelje janë konstatuar të dhënat e mangëta të evidentuara në regjistrimin elektronik të këtij institucioni privat shëndetësor për pacientin G.A.
“Gjatë verifikimit në sistemin elektronik të Ministrisë së Shëndetësisë, në Divizionin për Licencim dhe Akreditim (DLA), nuk figuron institucioni IPSH “AL – Dent V”. Sipas deklarimit të Dr. Ismet Uka, institucioni është në procedurë rilicencimi me emër të ri “Mara Dent SH.P.K.”, me datë aplikimi 14.01.2026, ku sipas tij është evidentuar i njëjti kuadër shëndetësor. Gjatë verifikimit zyrtar në Divizionin për Licencim dhe Akreditim, lidhur me lajmërimin e kuadrit shëndetësor të institucionit IPSH “AL – Dent V”, Inspektorati Shëndetësor ka konstatuar se: Në formularin e aplikimit me datë 16.11.2020 figuron institucioni “Al – Dent V”, me adresë Rr. “Ahmet Delia”, Skenderaj (foto si dëshmi). Personeli i lajmëruar në këtë aplikim figuron: Dr. Freskim Fadil Rrustemaj – Doktor i Stomatologjisë, Znj. Liridona Tahiri – Asistente e Stomatologjisë, me orar pune nga ora 09:00 – 16:00. Bazuar në këto të dhëna, rezulton se nga data e aplikimit fillestar, institucioni IPSH “AL – Dent V” nuk ka bërë lajmërim apo përditësim të kuadrit shëndetësor që ka ushtruar dhe që aktualisht ushtron veprimtari në këtë institucion”, thuhet në raportin e inspektimit të siguruar nga Veriu.info.
Çka deklaroi doktori?
Veriu.info ka siguruar edhe deklaratën e Dr. Ismet Uka për këtë rast, i cili thotë se pacienti e ka gëlltitur gjilpërën derisa ky ishte duke e analizuar radiografinë.
“Gjatë procedurës së largimit të pulpës më është nevojitur pamja radiografike për të përcaktuar gjatësinë e kanaleve. Andaj kam futë gjilpërën endodontike në dhëmb dhe kam realizuar radiografi retroalveolare (laptopi me rëntgenin retroalveolar digjital është ngjitur me poltronin stomatologjik) me ndihmën e asistentes, pacientin e kam udhëzuar që ta mbajë gojën hapur, dhe pastaj për disa sekonda kam analizuar radiografinë në laptop dhe kam përcaktuar gjatësinë e kanalit të dhëmbit. Jam kthyer shpejt te pacienti dhe kam parë që po mungon gjilpëra endodontike që ishte në dhëmb dhe pacienti ka pohuar që e ka gëlltitur gjilpërën”, thuhet ndër të tjera në deklaratën e Dr. Ismet Uka.
Pas kësaj ngjarje të rëndë, pacienti është dërguar në QKMF-në e Skenderajt për trajtim, ku nga aty është dërguar në Spitalin e Mitrovicës.
Inspektimi dhe shkeljet e konstatuara në ordinancë
Në përfundim të inspektimit, inspektorët kanë konstatuar shkelje të shumta në këtë ambulancë stomatologjike, për të cilat institucionit i është shqiptuar një gjobë, si dhe është nxjerrë vendim për ndalimin e ofrimit të shërbimeve shëndetësore deri në lajmërimin dhe përditësimin e kuadrit shëndetësor në Divizionin për Licencim dhe Akreditim (DLA) pranë Ministrisë së Shëndetësisë, në përputhje me Ligjin për Shëndetësi.
Veriu.info ka gjetur se ordinanca stomatologjike “AL-DENT V” ishte emri tregtar i biznesit individual të regjistruar në ARBK si “Valon Rama B.I.” në pronësi të Valon Rama.
Mirëpo, sipas të dhënave në ARBK, biznesi “Valon Rama B.I.” që funksiononte me emrin tregtar Ordinanca Stomatologjike “AL-DENT V” në Skenderaj, ishte shuar më datë 8 mars 2024, datë kur është hapur në ARBK Ordinanca Stomatologjike MARA Dent SH.P.K., për të cilën Dr. Ismet Uka në deklarim kishte thënë se janë në proces të rilicencimit me këtë biznes.
Veriu.info ka tentuar të marrë një qëndrim nga “AL – DENT V” për këtë raport inspektimi të Inspektoratit Shëndetësor, por deri në momentin e publikimit të artikullit nuk kemi pranuar përgjigje për pyetjet e dërguara.
Çka është gjilpëra endodontike dhe rreziqet
Në stomatologji, gjilpëra endodontike (e njohur edhe si fajll ose instrument endodontik) është një mjet shumë i hollë, fleksibil dhe me sipërfaqe gërryese, i cili përdoret gjatë trajtimit të kanaleve të rrënjës së dhëmbit (“heqja e nervit”).
Ato shërbejnë për pastrimin e indit të infektuar të pulpës, zgjerimin dhe formësimin e kanaleve të rrënjës në mënyrë që ato të dezinfektohen dhe të mbushen siç duhet.
Edhe pse këto janë mjete standarde të punës, trajtimi endodontik mbart rreziqe dhe komplikime potenciale. Ndër më të rëndat janë gëlltitja ose aspirimi aksidental i instrumentit – siç ndodhi në rastin konkret – thyerja e tij brenda kanalit, perforimi i rrënjës, si dhe infeksionet që vijnë si pasojë e mospastrimit të plotë.
Në aspektin e sigurisë mjekësore dhe ligjore, stomatologu ka obligimin kryesor dhe të plotë që të kujdeset për parandalimin e gëlltitjes ose aspirimit të mjeteve gjatë trajtimit, duke zbatuar protokollet e detyrueshme të sigurisë, siç është vendosja e digës me gomë (koferdamit) e cila e bën fizikisht të pamundur rënien e ndonjë instrumenti në fytin e pacientit.
LEXONI EDHE:
