Donald Trump po luan një nga kartat e tij të fundit në garën për zgjedhjet e mesmandatit: frikën nga kolapsi i qytetërimit amerikan.
Po ta dëgjosh presidentin, kërcënimi më i madh aktual për amerikanët nuk është kostoja e papërballueshme e ushqimeve, benzinës, naftës dizel dhe banimit; ngërçi në të cilin e ka futur veten me luftën e tij në Iran; apo shqetësimet se inteligjenca artificiale mund të zhdukë vendet e punës dhe madje njerëzimin.
Kërcënimi, sipas tij, është se kultura e bardhë dhe e krishterë mund të shkatërrohet, nëse në zgjedhjet e mesmandatit nuk ruhet monopoli i republikanëve të tij mbi pushtetin në Washington.
Në një nga fjalimet përmbyllëse më ogurzeza të cilitdo prej fushatave të tij politike, Trump po përdor retorikë me ngarkesë racore; po ngjall paranojë islamofobike; dhe po nxit pamje të rreme të fëmijëve që gjymtohen përmes ndërhyrjeve kirurgjikale masive për ndryshimin e gjinisë, pa pëlqimin e prindërve. Ai po sillet gjithashtu si arbitër i besimit të të tjerëve dhe i identitetit amerikan, shkruan CNN.
“Amerikanët do të ngrihen në këmbë dhe do të deklarojnë se do ta mbrojmë qytetërimin tonë, do ta ruajmë fenë, vlerat dhe trashëgiminë tonë dhe nuk do ta lejojmë kurrë kombin tonë të pushtohet apo të shkatërrohet nga njerëz që na urrejnë”, tha Trump në një tubim në Kansas të hënën, ku ai gjithashtu përdori një fyerje antisemite.
Në momentin e tij politikisht më të cenueshëm në gati gjashtë vjet si president, Trump nuk po përgjigjet me mbrojtje bindëse dhe novatore të bilancit të tij në lidhje me përballueshmërinë e jetesës apo politikën e jashtme. Ai po e intensifikon retorikën shkatërruese që e bëri të famshëm dhe po kërkon ta ripërtërijë pushtetin duke i shfrytëzuar si armë ndarjet e dhimbshme kombëtare.
Si shembull i gatishmërisë së tij për t’u përfshirë në disa nga çështjet më të ndjeshme kulturore, Trump paralajmëroi në tubimin e tij në Kansas se kandidati demokrat për Senat, Adam Hamilton, u kishte thënë njerëzve të “pendoheshin sepse kishin lindur të bardhë”. Ky ishte një paraqitje e shtrembëruar e deklaratave shumë më të gjera të kandidatit për racën, vetëreflektimin dhe besimin personal.
Por, ta thuash saktë se çfarë ka ndodhur, vështirë se është thelbi i çështjes.
