Veprimtaria e shumë prej institucioneve private shëndetësore në Kosovë është kthyer në sfidë për shtetin, pasi që ato po operojnë shpeshherë në mënyrë të kundërligjshme me shërbime të palicencuara, gjë që paraqet edhe rrezik për shëndetin dhe jetën e pacientëve.
Në kuadër të hulumtimit për institucionet private shëndetësore që janë gjetur duke kryer shkelje të Ligjit për Shëndetësi, Veriu.info ka siguruar dokumentacion zyrtar që tregon se në Poliklinikën “Miliona” Sh.P.K. në Prishtinë janë hasur parregullsi nga inspektorët shëndetësorë, të cilat nuk janë evituar nga themeluesi Salih Imeri edhe pas ri-inspektimit.
Veriu.info ka siguruar një raport të ri-inspektimit që mban datën 17 qershor 2026, të hartuar për ri-inspektimin në “Miliona” Sh.P.K. të kryer më 9 qershor 2026, i cili ishte kryer për të verifikuar plotësimin e rekomandimeve të dhëna në lidhje me inspektimin paraprak të realizuar më 24 shkurt 2026.
Në raport thuhet se me 24 shkurt poliklinikës i ishin dhënë dy rekomandime: Lajmërimi i shërbimit të laserit në Divizionin për Licencim dhe Akreditim të Ministrisë së Shëndetësisë dhe Licencimi i Kabinetit të Radiologjisë Stomatologjike.
Mirëpo, përkundër kërkesës së Inspektoratit Shëndetësor, Poliklinika “Miliona” e Salih Imeri kishte sfiduar organet shtetërore, duke mos e licencuar Kabinetin e Radiologjisë Stomatologjike.
Përkundër moslicencimit, inspektorët kanë gjetur dëshmi se Poliklinika “Miliona” kishte shërbime të radiologjisë stomatologjike. Këto dëshmi ishin gjetur në protokollin e pacientëve dhe në sistemin kompjuterik të radiologjisë.
Në procesverbalin e këtij ri-inspektimi që ka siguruar Veriu.info, te rubrika e vendimeve të marra shkruan: “Ndalohet ofrimi i shërbimeve të radiologjisë derisa të licencohet si njësi në sistemin DLA (Divizioni për Licencim dhe Akreditim i Ministrisë së Shëndetësisë)”.
Veriu.info ka siguruar edhe deklaratën me shkrim të dhënë nga Salih Imeri, themelues i “Miliona”, ku ai deklaron se për këtë shërbim të palicencuar ka aplikuar dhe nuk ka marrë përgjigje.
Por ai nuk jep asnjë shpjegim pse ka ofruar shërbime të palicencuara, sepse mosmarrja e një përgjigje institucionale, nuk i jep askujt të drejtën të ofrojë shërbime të palicencuara.
LEXONI EDHE:
