Izraelitët u zgjuan të mërkurën përballë një ngërçi të njohur politik, pasi as koalicioni i djathtë i kryeministrit Benjamin Netanyahu dhe as opozita nuk arritën të fitonin një shumicë të qartë për ta formuar qeverinë, shkruan CNN.
Këto rezultate i shtohen serisë së paprecedentë të paralizës politike, e cila ka sjellë gjashtë palë zgjedhje brenda shtatë vjetësh. Nga viti 2019 deri në vitin 2022, vendi votoi në pesë runde zgjedhjesh, pasi asnjëra palë nuk arriti të siguronte një shumicë të qartë prej 61 ulësesh në parlamentin me 120 ulëse dhe të mbante një koalicion funksional, duke pasqyruar një vend thellësisht të përçarë për sa i përket udhëheqjes dhe drejtimit të tij.
Netanyahu, kryeministri me mandatin më të gjatë në historinë e Izraelit, është gjithashtu kryeministri i parë në detyrë ndaj të cilit janë ngritur akuza për korrupsion. Kjo ka ndikuar ndjeshëm në formësimin e hartës politike të vendit gjatë kohës së tij në pushtet, pasi shumica e partive opozitare kanë refuzuar të bashkëpunojnë me të, duke e shtyrë atë të mbështetet gjithnjë e më shumë te partitë e së djathtës ekstreme dhe ato ultraortodokse. Vetëm në zgjedhjet e vitit 2022 ai dhe aleatët e tij arritën ta fitonin shumicën.
Duke u mbështetur te partitë nacionaliste dhe fetare, Netanyahu arriti ta mbante qeverinë e tij në këmbë gjatë të gjithë mandatit katërvjeçar, hera e parë që nga viti 1988 që një qeveri e përfundonte mandatin e saj të plotë.
Menjëherë pas inaugurimit të qeverisë, ajo nisi të shtynte përpara një reformë të gjerë të sistemit gjyqësor, e cila u prit me protesta të gjera liberale. Protestat vazhduan deri në sulmin e Hamasit ndaj Izraelit më 7 tetor 2023, dështimin më të madh të sigurisë në historinë e vendit, dhe luftën në disa fronte që pasoi.
Edhe një herë, këto zgjedhje ishin një referendum për udhëheqjen e Netanyahut, por edhe për drejtimin dhe identitetin e vendit. Rezultatet e përforcojnë përçarjen e thellë dhe polarizimin mes izraelitëve lidhur me vlerat demokratike, fenë dhe shtetin, shërbimin ushtarak dhe përgjegjësinë.
