Albert Sylaj, i dyshuar për vrasjen e Arlinda Zekajt, do të qëndrojë një muaj në paraburgim, pas vendimit të Gjykatës Themelore në Pejë, e cila e aprovoi kërkesën e Prokurorisë.
Sylaj, i ngarkuar me veprën penale “Vrasje e rëndë”, u arrestua mbrëmjen e së martës në Deçan, pasi ishte në arrati që nga mbrëmja e 25 tetorit, kur dyshohet se e kreu vrasjen.
Gazetarja e Klan Kosovës, Qëndresa Tërshani, ka mësuar nga burime brenda seancës se është kundërshtuar paraburgimin me pretendimin se Sylaj nuk paraqet rrezikshmëri dhe se qëndrimi i tij në arrati nuk lidhet me synimin për t’u larguar nga shteti.
Siç mëson Klan Kosova, i njëjti kishte planifikuar vetëvrasjen pasi e vrau Arlindën me sëpatë.
Por, pas negocimit me policinë, përmes nënës së tij, është bindur të dorëzohet.
Burimet thonë se Alberti ka pretenduar se vrasjen e kreu në afekt.
Megjithatë, pas përfundimit të seancës, gjyqtari nxori vendimin për paraburgim.
Albert Sylaj e privoi nga jeta Arlinda Zekajn, në Vitomiricë të Pejës.
E ndjera kishte pasur probleme të shumta me bashkëshortin e saj, Jeton Sylaj, për çka kishte kërkuar ndihmë te organet e drejtësisë, edhe duke paralajmëruar se mund t’i ndodhë më e keqja.
Fatkeqësisht, shteti nuk arriti të mbrojë.
Për rastin e Arlindës dhe shumë grave të vrara në Kosovë, sot pati protestë në Prishtinë, ku u kërkua drejtësi.
