Gjatë hulumtimit për institucionet shëndetësore private që operojnë në mënyrë të kundërligjshme, me shërbime të palicencuara dhe staf ilegal (të palicencuar), kemi hasur edhe në një Kabinet të Radiologjisë në Prizren që është gjobitur nga Inspektorati Shëndetësor, për shkak të ofrimit të shërbimeve shëndetësore pa licencë.
Veriu.info ka siguruar një raport inspektimi të Inspektoratit Shëndetësor në të cilin janë evidentuar shkelje të gjetura në Kabinetin e Radiologjisë “ProDiagnostic XS” në Prizren me themelues Xhemal Nazifi, të cilit i janë vendosura edhe disa ndalesa.
Sipas raportit dhe procesverbalit është konstatuar se në “ProDiagnostic XS” janë ofruar shërbime shëndetësore të palicencuara.
“Gjatë verifikimit të regjistrit të pacientëve, u konstatua se në kuadër të institucionit (Kabinet për Radiologji) ofrohen shërbime shëndetësore të ekografisë. Nga verifikimi në sistemin elektronik të Divizionit për Licencim dhe Akreditim (DLA) në Ministrinë e Shëndetësisë, rezultoi se ky shërbim nuk figuron i lajmëruar dhe i licencuar”, thuhet në raportin që e posedon Veriu.info.
Gjetje tjetër në “ProDiagnostic XS” është evidentuar mungesa e dozimetrit personal për monitorimin e ekspozimit profesional ndaj rrezatimit jonizues për stafin që punon me pajisje radiologjike.
Mungesa e dozimetrit personal përbën një rrezik serioz ligjor, institucional, por mbi të gjitha shëndetësor dhe profesional për stafin. Rreziqet kryesore që vijnë nga mosaplikimi i këtij monitorimi janë: ekspozimi i pakontrolluar dhe tejkalimi i kufijve të lejuar të rrezatimit, dëmtimet afatgjata shëndetësore (efektet stohastike dhe deterministike), si dhe mungesa e sinjalizimit të parakohshëm për defektet apo rrjedhjet e mundshme.
Në fund të inspektimit, Kabinetit të Radiologjisë “ProDiagnostic XS” i është ndaluar të ofrojë shërbime shëndetësore që nuk janë të lajmëruara dhe të licencuara në DLA/MSh.
Po ashtu këtij institucioni privat i është shqiptuar edhe një gjobë prej vetëm 1 mijë euro për shkeljet e konstatuara.
Veriu.info ka marrë edhe qëndrimin e “ProDiagnostic XS” për këtë inspektim, ku në një përgjigje të shkurtër të tyre thuhet: “Të gjitha ato kërkesa ne i kemi plotësu në vazhdim, por edhe kemi qenë të dënuar dhe e kemi paguar gjobën”.
Ndër dokumentet e siguruara nga Veriu.info është edhe çmimorja e gjetur nga inspektorët në “ProDiagnostic XS”, prej së cilës në shërbimet e ekografisë hyjnë: Ultrazëri i abdomenit, Ultrazëri i qafës, Ultrazëri i gjirit, Ultrazëri i testiseve, Doppleri i karotideve dhe Doppleri i ekstremiteteve.
Ndryshe, subjekti juridik që ka në zotërim këtë Kabinet të Radiologjisë është kompania “Prodiagnostic XS O.P.” e themeluar në Prizren në vitin 2009. Pronarë të saj janë Xhemal Nazifi dhe Sylejman Krasniqi.
Pamje të inspektimit nga hapësirat ku janë evidentuar shkeljet:
LEXONI EDHE:
