Ministrja e Drejtësisë, Donika Gërvalla, dhe ministri i Punëve të Brendshme, Xhelal Sveçla, kanë mbajtur sot një konferencë të përbashkët për media, ku kanë prezantuar gjetjet e raportit lidhur me rastin e vrasjes së Arlinda Zekajt në Vitomiricë të Pejës.
Gërvalla bëri të ditur se raporti nuk është ende plotësisht i përfunduar, pasi Zyra e Koordinatores nuk ka marrë të gjitha përgjigjet e detajuara dhe dokumentacionin shtesë nga institucionet përkatëse.
Megjithatë, ajo tha se gjetjet e deritanishme nxjerrin në pah mangësi serioze dhe vonesa në trajtimin e rastit.
“Konstatimi më shqetësues është se kjo vrasje nuk ndodhi pa paralajmërim”, u shpreh Gërvalla.
“Raporti mbështetet nga dokumentacioni, analizon veprimet dhe mosveprimet nga raportimi i parë i Arlindës deri tek vrasja e saj. Raporti është pejsërisht i plotë, sepse zyra e koordinatores s’ka marrë përgjigjje të detajuar. Presim ende dokumentacion dhe sqarime shtesë. Por raporti nxjerr në pah mangësi serioze dhe vonesa. Konstatimi më shqetësues, se ajo nuk u vra pa paralajmërim. Arlinda raportoi dhunën fizike e psikologjike. Ajo raportoi kercënimet dhe informoi policinë që bashkëshorti posedoi armë”, tha Gervalla.
Duke paraqitur kronologjinë e rastit, ministrja ka treguar se më 10 korrik 2026, Arlinda Zekaj kishte raportuar në Policinë e Kosovës dhunën fizike dhe psikologjike nga bashkëshorti i saj i parë.
Sipas Gërvallës, ajo kishte raportuar kërcënimet, kishte dorëzuar prova për veprimet e dhunshme dhe e kishte informuar policinë se bashkëshorti posedonte armë me leje.
“Një tjetër shqetësim i vazhdueshëm ishte pamundësia për t’u kthyer në shtëpinë e përbashkët dhe për të pasur kontakt të rregullt me djalin e saj, 12-vjeçar. Megjithëse bashkëpronare e shtëpisë ajo raportonte se bashkëshorti, por edhe familjarë të bashkëshortit të cilët qëndronin aty kundër vullnetit të saj, e pengonin të hynte në pronën e saj. Më 7 shtator, Arlinda Zekaj kërkoi urdhër mbrojtje emergjente nga Gjykata Themelore në Pejë. Po atë ditë, ajo i shkroi gjykatës se kishte frikë për jetën e saj dhe të fëmijës së saj. Pra, rreziku ishte raportuar, shprehimisht, dhe ishte i dokumentuar”, ka thënë ministrja.
Duke folur për përgjegjësinë e Gjykatës Themelore në Pejë, Gërvalla ka thënë se raporti ka evidentuar shkelje të afateve ligjore gjatë trajtimit të kërkesës për urdhër mbrojtjeje emergjente.
“Më 7 shtator, gjykata miraton pjesërisht kërkesën për mbrojtje emergjente. Më 9 shtator, pra dy ditë më vonë, Arlinda Zekaj e kundërshton këtë vendim, sepse ai nuk përfshinte edhe kujdesin për djalin e saj”, ka deklaruar Gërvalla./
