Gazetari i shoubizit, Elton Tozaj, ka ngritur shqetësim te ndjekësit e tij pas publikimit të një fotografie tronditëse në rrjetet sociale, përmes së cilës duket se ka bërë të ditur se është përballur me një tjetër sulm.
Në fotografinë e publikuar në InstaStory, Tozaj shfaqet me kokën e mbështjellë me fasha, ndërsa në veshjet e tij vërehen njolla gjaku.
Pamja është shoqëruar edhe me një mesazh të fortë, ku gazetari shpreh zemërimin ndaj personave që, sipas tij, qëndrojnë pas asaj që ka ndodhur.
Foto: Screenshot/Instagram
“Kushdo që e bëri këtë do ta paguajë shumë shtrenjtë! Nuk më ndalni dot”, ka shkruar ai.
Postimi ka ngjallur reagime, marrë parasysh se kjo nuk është hera e parë që gazetari raporton për një përvojë të dhunshme.
Në dhjetor të vitit të kaluar, Tozaj ishte bërë gjithashtu pjesë e një ngjarjeje të rëndë, pasi ishte dhunuar fizikisht dhe kishte pësuar lëndime serioze.
Deri më tani, nuk janë publikuar detaje të tjera lidhur me rrethanat e pretenduara të sulmit apo identitetin e personave të përfshirë. /Telegrafi/
