Varësia nga droga në Kosovë sa vjen e shtohet dhe kjo dëshmohet çdo ditë me kapjen dhe arrestimin e dhjetëra personave konsumues të substancave narkotike. Por kjo dukuri nuk po i mban imun as personat që janë prapa grilave. Sikleti për të konsumuar drogë po i detyron ata që të kërkojnë nga të afërmit të veprojnë kundërligjshëm, për t’iu dërguar sasi të ndryshme të narkotikëve, raporton Gazeta Sinjali.
Dy raste të tilla janë zbuluar pak ditë më parë në Qendrën Korrektuese në Dubravë, ku oficerët korrektues kanë gjetur substanca të dyshuara narkotike te të burgosurit.
Rasti i parë është hasur te një i burgosur, ku gjatë kontrollit është gjetur një sasi e substancës së dyshuar narkotike e llojit marihuanë. Lidhur me këtë, prokurori ka urdhëruar që të iniciohet rasti ‘Posedim i paautorizuar i narkotikëve, substancave psikotrope ose analoge’.
Të njëjtën ditë, në shëtitoren e njërit prej pavijoneve është vërejtur një person i cili po bënte lëvizje të dyshimta në afërsi të rrethojave të burgut, me ç’rast oficerët korrektues kanë shkuar menjëherë aty për kontroll.
Te të burgosurit nuk kanë gjetur asgjë të dyshimtë, mirëpo në afërsi të rrethojave janë gjetur dy sasi të marihuanës.
Me urdhër të Prokurorit të Shtetit, rasti është iniciuar ‘Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge’
