Një numër i shkollave në komunat e Kosovës kanë vendosur të ndërpresin grevën, duke mos respektuar thirrjen e SBASHK-ut për vazhdimin e saj.
Aktualisht mësimi është duke u zhvilluar në 14 komuna të Kosovës, ku në disa shkolla mësimi po zhvillohet pjesërisht e në disa të tjera është duke u zhvilluar procesi i plotë mësimor.
Sipas MASHTI-t, në kryeqytet mësimi është duke u zhvilluar në Qendrën e Kompetencës “Shtjefën Gjeçovi”, po ashtu në Qendrën Burimore “Përparimi”. Ndërkaq, në shkollat “Faik Konica”, “Xhavit Ahmeti”, “Ismail Qemali”, “Andon Z. Çajupi”, dhe “Dituria”, mësimi është duke u zhvilluar pjesërisht.
“Në Gjakovë mësimi është duke u zhvilluar në këto shkolla: Në SHFMU ‘Mustafa Bakija’, SHMLE ‘Kadri Kusari’, SHFMU ‘Mazllum Këpuska’, SHFMU ‘Fan Noli’-Dujakë dhe në Qendrën e arsimit Profesional. Ndërkaq, në shkollat ‘Emin Duraku’, ‘Fehmi Agani’, ‘Kelmend Rizvanolli’, ‘Yll Morina’,’Zekeria Rexha’,’Shtjefën Kurti’ në Novosellë e Epërme dhe në shkollën e muzikës ‘Prenk Jakova’, mësimi është duke u zhvilluar pjesërisht. Në Podujevë përveç dy shkollave, në të gjitha shkollat tjera është duke u zhvilluar procesi edukativo-arsimor por jo me kapacitete të plota. Po ashtu, institucioni parashkollor ‘Armela’,është duke e zhvilluar normalisht procesin edukativ”, thuhet në përgjigjen e MASHTI-t, për Telegrafin.
Sipas të dhënave që i posedon Inspektorati i Arsimit, MASHTI ka bërë të ditur se në komunën e Kamenicës, mësimi është duke u zhvilluar në këto shkolla: SHFMU “Hasan Prishtina” në Busavatë, SHFMU “Asllan Thaçi në Karaçevë të Poshtme, në paralelen e ndarë të shkollës “Kadri Zeka” në Hogosht, në Gjimnazin “Ismail Qemali” dhe në SHFMU “Xhelal Sopi” në Petroc.
Kurse pjesërisht mësimi është duke u zhvilluar në shkollat “Abdullah Krashnica”, “Dëshmorët e Kombit”,”Xhavit Ahmeti”, në Hodonoc “Adem Hashani” në Muqivërc. Procesi edukativ në këtë komunë është duke u zhvilluar edhe në institucionin parashkollor “Filizat”.
“Në Ferizaj është duke u mbajtur mësim pjesërisht në shkollat “Gjon Sereçi”, dhe shkollën “Hajriz Muhadini”. Në Fushë Kosovë është duke mbajtur mësim Gjimnazi “Hivzi Sylejmani”. Në Mitrovicë, mësim janë duke zhvilluar paralelja e ndarë e shkollës “Aziz Sylejmani” në Kodrën e Minatorëve -në Mitrovicën Veriore dhe 3 mësimdhënës të ciklit të ulët. Po ashtu, mësimi është duke u mbajtur edhe në Qendrën Burimore “Nëna Terezë””, ka bërë të ditur MASHTI.
Grevën nuk janë duke e zhvilluar edhe disa shkolla në Pejë dhe Deçan. Sipas të dhënave nga MASHTI që i ka përcjell Telegrafit, në Pejë është duke u mbajtur mësimi pjesërisht në shkollën “Lidhja e Prizrenit, në shkollën “Ramiz Sadiku” dhe po ashtu në IIAP “Ali Hadri”, kurse në Deçan në shkollën “Jusuf Gërvalla”, një mësuese e klasës së 3 është duke mbajtur mësim.
Edhe një mësimdhënës në shkollën “Nazmi Pajaziti” në Viti ka vendosur që të filloj procesin mësimor.
Sipas Ministrisë së Arsimit në Kaçanik dy mësimdhënëse të ciklit klasor të shkollës “Emin Duraku”, dhe dy mësimdhënëse të ciklit klasor 1-5 janë duke mbajtur mësim.
“Në Prizren në shkollën e mesme teknike “11 marsi”, 17 përqind e stafit nuk janë në grevë. Në Qendrën Burimore “Lef Nosi” mësimin po e mbajnë rreth 25 përqind të mësimdhënësve. Në Shtime mësimi është duke u mbajtur në Qendrën Burimore “Shpresa”. Ndërkaq në Vushtri në shkollën “Mustafë Venhari” (kl.1-5), punojnë vetëm 2 mësimdhënëse, kurse të tjerët në grevë”, thuhet në përgjigjen e MASHTI-t.
Greva në sektorin publik ka filluar më 25 gusht. Sindikalistët ndër të tjerash po kërkojnë rritje të pagës prej 100 euro, derisa të hyjë në fuqi Projektligji për Pagat. E greva në arsim ka hyrë në javën e tretë dhe ende asnjë marrëveshje mes Sindikatave të Bashkuara të Arsimit (SBASHK) dhe Qeverisë së Kosovës.
SBASHK-u së fundmi ka dalë edhe me tri kërkesa të reja për Qeverinë e Kosovës. Kryetari i SBASHK-ut, Rrahman Jasharaj ka kërkuar që nga janari i vitit 2023 të ketë rritje prej 10 për qind të pagës për mësimdhënësit.
Ndërkohë deri në janar, mësimdhënësit sikurse edhe shërbyesit tjerë publik duhet të marrin shtesat prej 50 eurove që i ka premtuar Kurti me pakon e re mbështetëse.
Në pikën dy të kërkesës së SBASHK-ut, kërkohet që të ndryshohet ligji për Skemat Pensionale, kushti 15 vite përvojë punë dhe pika tre që deri në fund të vitit 2022 të fillojë së zbatuari Ligji për sigurime shëndetësore nga viti 2023.
