Komisioni për Mbikëqyrjen e Financave Publike, në rend dite kishte shqyrtimin e raportit të Auditorit të Përgjithshëm për Raportin Vjetor Financiar të Buxhetit të Republikës së Kosovës për vitin 2021.
Të ftuar ishin Ministri i Financave, Punës dhe Transfereve, Hekuran Murati dhe Auditorja e Përgjithshme e ZKA-së, Vlora Spanca.
Mirëpo ministri për shkak të një vizite në Durrës nuk ka qenë i pranishëm në Komision.
Kryetarja Hykmete Bajrami tha se nuk kanë marrë konfirmim nga kabineti për mungesën e Muratit, duke shtuar se raporti s’mund të shqyrtohet pa prezencën e tij.
“Prezencën qe 10 dite e ka konfirmuar. Na nuk kemi pasur njoftim prej kabinetit. Nuk kemi mundësi me shqyrtuar raportin e auditimit pa prezencë të ministrit të Financave. Ka afate ligjore që ky raport mu aprovuar edhe në seancë plenare”.
“Ne e shtyjmë edhe javën tjetër, por ka shumë gjëra për të diskutuar. Ministrit nuk i ka konvenuar të vijë sot dhe i njëjti raport shqyrtohet në Komisionin për Buxhet dhe nuk është e pranueshme dhe e shtyjmë javën tjetër”.
Deputeti i PDK, Hajdar Beqa, e ka quajtur Muratin ministër të papërgjegjshëm që nuk i ka ekzekutuar paga e mësimdhënësve.Ai ka shtuar se raporti ka shumë mangësi, por edhe elemente që mund të dërgohen në Prokurori.“Është një praktikë dhe e pakuptimtë që të shqyrtohet pa ministrin raporti vjetor. Mos prezenca e tij e shohë si sjellje jo serioze dhe propozojmë të shkojë në Kuvend për seancë plenare”.
“Ka elemente edhe për Prokurori. Një ministër që ndal pagat e mësimdhënësve. Ky ministër është i papërgjegjshëm”.Deputetja e VV, Arta Baraliu, ka kërkuar që mos të bëhet politikë me çështje e tjera që nuk lidhen me temën që ishte në rend dite.
“Nuk është e nevojshëm te bëjmë politikë me çështje tjera”.
Deputetja e AAK, Albana Bytyqi, i ka kërkuar kolegëve të pozitës që mos të bëhen avokat i ministrit, duke shtuar se është e papranishme që ai të shkojë në Durrës e mos të marrë pjesë në mbledhje, raporton EO.
“Mendoj që duhet të shtyhet raporti sepse është e rëndësishme me qenë ministri prezent dhe sot ka gjetur kohën me shkuar në Durrës është e papranueshme dhe s’keni nevojë të bëheni avokat”.
