Partia Guxo kohë më parë mbajti zgjedhjet qendrore, duke zgjedhur drejtuesit e partisë. Në fakt, në Kuvendin e 7 shtatorit, që u organizua në Prishtinë, kjo parti zgjodhi dy kryetarë, duke u bërë partia e parë kosovare me një formë të tillë udhëheqje.
Por, Komisioni Qendror Zgjedhor nuk e ka njohur këtë Kuvend zgjedhor, gjersa Zyra për Regjistrimin e Partive dhe Çertifikim në KQZ ka rekomanduar rimbajtjen e saj brenda 45 ditëve, shkruan gazeta 10.
“Sipas shpjegimit të përfaqësuesit të partisë politike Guxo, votimi i dy Kryetarëve ishte më shumë veprim politik dhe se në arenën politike Guxo do të përfaqësohet nga dy Kryetarë, Donika Gërvalla Schëarz dhe Faton Peci, të cilët janë votuar në Kuvend ndërsa ligjërisht Guxo përfaqësohet vetëm nga Faton Peci”, theksohet në këtë raport.
Në këtë raport të siguruara nga Gazeta 10, theksohet se ndryshimet e statutit të Guxos nuk janë në përputhje me rregullat legjislative aktuale.
“Zyra vlerëson që ndryshimi i Statutit të partisë politike për të lejuar partinë të ketë më shumë se një Kryetar, është shkelje e Rregullës 01/2013 për Regjstrimin dhe veprimin e partive politike, më saktësisht e çdo neni ku përmendet Kryetari si një person i vetëm. Pra kjo Rregullë në asnjë nen nuk e thekson mundësinë që një parti politike e regjistruar mund të ketë më shumë se një kryetar”, theksohet në raport.
“Duke u nisur nga çfarë u tha më lartë, në përputhje me nenin 14, paragrafi 3 i Rregullës 01/2013 i cili thekson se ndryshimi i Stautit të partisë politike që nuk është në përputhje me këtë Rregull, është i pavlefshëm. Zyra konstaton se ndryshimet e Statutit të partisë politike Guxo që kanë dalur nga Kuvendi i parë themelues i datës 7 shtator 2022, janë të pavlefshme dhe rrjedhimisht votimi i dy Kryetarëve konsiderohet i pafvlefshëm”, shkruhet tutje në raport.
