Ish-ministri nga radhët e Listës Serbe, Ivan Todosijeviq është dënuar me një vit burgim nga Gjykata Themelore e Prishtinës, raporton T7.
Todosijeviq u gjet fajtor për nxitje të urrejtjes, përçarjes dhe mosdurimit kombtar, racor, fetar ose etnik, pak vjet pasi në cilësinë e ministrit të Administrimit të Pushtetit Lokal kishte marrë guximin ta quante trillim masakrën e Reçakut.
Prokurori Atdhe Dema, në fjalën përfundimtare kishte thënë se Todosijeviq e ka sulmuar një popull të tërë duke nxitur urrejtje e përçarje.
Dënimi i Todosijeviqit vjen pasi Gjykata Supreme e kishte kthyer rastin në rigjykim në dhjetor të vitit të kaluar, pak pasi politikani serb ishte dënuar me dy vjet burgim.
“Arsyeja për agresionin në shtetin tonë ka qenë e ashtuquajtura katastrofë humanitare në Kosovë e Metohi… Masakra e Reçakut ishte trillim… Janë terroristët shqiptarë që e trilluan gjithë këtë dhe bënë krimet më të mëdha në Kosovë e Metohi… Për këtë, sot e kësaj dite askush nuk ka dhënë përgjegjësi…Kanë bërë krime para agresionit të NATO-s, kanë vrarë shtëpiak të mirë serb dhe policë në vendin e tyre të punës… gjak pirjen e tyre e kanë vazhduar edhe gjatë agresionit edhe pas ardhjes të së ashtuquajturës mision paqësor në Kosovë e Metohi”, pati thënë Todosijeviq në mars të vitit 2019, me rastin e 20-vjetorit të nisjes së bombardimeve të NATO-s në caqet e ish-ushtrisë serbe.
Në masakrën e Reçakut, në janar të vitit 1999, ishin vrarë 45 civilë nga ushtria serbe. Fushata ushtarake e NATO-s i kishte dhënë fund luftës në Kosovë.
