Në vizitën e tij në Shtetet e Bashkuara të Amerikës, kryeministri Albin Kurti kishte gjetur kohë të fliste për Gjykatën Speciale. Më konkretisht për mundësinë e vizitës së tij tek Hashim Thaçi dhe të tjerët, që po mbahen që dy vite të paraburgosur nga Dhomat e Specializuaras. Tash kur kanë kaluar 5 muaj nga fjalimi i tij, Kurti ende nuk ka shkuar në Hagë për të vizituar ata që dikur i kritikonte ashpër.
“Mund të shkojmë…nuk kam kurrfarë problemi”, ishte fjalia me të cilin Kurti në një formë e “paralajmëronte” vizitën në Hagë. Ishte një kapërcim i madh, nga “shko Hashim” në “mund të shkojë për vizitë”.
Por, ndryshe nga Kurti, zëvendësi i tij në Lëvizjen Vetëvendosje, Glauk Konjufca, ka udhëtuar në drejtim të Hagës, e ku u takua me ish-krerët e UÇK-së.
Nga Amerika atëbotë Kurti e kritikoi Gjykatën Speciale për mungesë të transparencës, duke theksuar se ajo duhet të ketë një mbikëqyrje.
Vizita e munguar
Kryeministri Albin Kurti, siç shkruante 5 muaj më parë gazeta Nacionale, gjatë një qëndrimi në Dallas, ku takonte diasporën shqiptare në ShBA, foli për Specialën. Shefi i ekzekutivit vlerësonte se nuk ka kurrfarë problemi të vizitojë Thaçin dhe të tjerët.
“Tash e ka marrë për barrë Ministria e Drejtësisë aspektin e vizitave, por nëse e konsiderojmë bashkërisht, mund të shkojmë, absolutisht, nuk ka kurrfarë problemi për këtë, sepse Tribunali i Hagës, EULEX-i, UNMIK-u, që të gjithë këta shkuan, e tash e kemi edhe një Gjykatë Speciale, e cila i ka që të gjithë shqiptar aty brenda. Kjo është brengë e imja, jo veç si aktivist politik i moçëm e qytetar republike, por para së gjithash si kryeministër i Qeverisë së Republikës së Kosovës”, deklaronte Kurti në ShBA.
Tutje, një fjalimin e tij, për të cilin ekskluzivisht kishte raportuar Nacionale, Kurti kishte edhe kritika ndaj Gjykatës Speciale.
“Së pari unë e kam pas një takim me të gjithë avokatët të cilët i mbrojnë luftëtarët e UÇK-së në Hagë. Sepse jam i interesuar të kuptoj më shumë se çka po ndodh, edhe të ketë një mbikëqyrje dhe llogaridhënie më të madhe të Gjykatës Speciale, e cila nuk e ka pasur për karakteristikë të theksuar transparencën. Dhe gjithashtu të marrë vesh se kur konsiderojnë këta avokatë që në procesin gjyqësor atje po dëmtohet shteti i Kosovës dhe historia e jonë”, theksonte Kurti para bashkatdhetarëve në Dallas të ShBA-së.
Tutje, Kurti vlerësonte se vetëm duke e mbrojtur luftën e UÇK-së mund të mbrohet secili individ në Gjykatës Speciale, duke sugjeruar një koordinim ndërmjet avokatëve të Thaçit, Veselit, Selimit, Krasniqit e të tjerëve.
“Por, po e ritheksoj, më e rëndësishmja që e besoj unë tash është një lloj, mbase edhe koordinimi i këtyre avokatëve me njëri tjetrin. Sepse mua më ka interesuar se sa takohen ata shpesh, sepse ju e dini fort mirë që proceset gjyqësore që avokatët e kanë një prirje me shpëtu klientin e vetë. Pra secili avokat dëshiron me shpëtu klientin e vetë. A na kemi më së shumti nevojë me mbrojt komplet luftën e UÇK-së dhe vetëm duke e mbrojtur luftën e UÇK-së në mënyrë të suksesshme, atëherë mund të mbrohet secili”, thoshte Kurti.
Në Hagë, përveç z.Konjufcës, ka qëndruar edhe Albulena Haxhiu, ministre e Drejtësisë në Qeverinë Kurti II. Por ministrja Haxhiu nuk u pranua në takim nga Thaçi e Veseli, të cilit Haxhiu i kiritikonte ashpër sa dy ish-krerët e UÇK qenë aktiv në politikë.
Kujtojmë që Hashim Thaçi, Kadri Veseli, Rexhep Selimi e Jakup Krasniqi sot kanë përvjetorin e dytë të arrestimit nga ana e Gjykatës Speciale./Nacionale
