Aktivistët e organizatës ORCA, Rron Gjinovci dhe Dibran Hoxha janë arrestuar sot nga policia e Kosovës derisa po zhvillonin një aktivitet në Fakultetin Filozofik kundër profesorëve Bujar Dugolli dhe Ardian Kastrati të cilët akuzohen për plagjiaturë, raporton Gazeta Online Veriu.info.
Akvistët e ORCA-s po zhvillonin aktivitet për pamundësimin e mbajtjes së peocesit mësimor të profesorëve të shpallur si plagjiatorë nga Këshilli i Etikës i Universitetit të Prishtinës.
“Në të gjitha rastet kur institucionet tregohen të paafta për t’i jetësuar vendimet meritore ndëshkuese për kryesit e shkeljeve, ORCA do të reagojë duke iu pamundësuar kryesve aktivitetin e tyre të përditshëm normal.” – thuhet në komunikatën e kësaj organizate.
Komunikata e plotë:
ARRESTOHEN AKTIVISTËT E ORCA-S – PLAGJIATORËT DO T’I NDALIM EDHE FIZIKISHT
Sot aktivistët e ORCA-s, Dibran Hoxha dhe Rron Gjinovci, u arrestuan pas aksionit simbolik ndaj plagjiatorëve të shpallur nga Këshilli i Etikës në Fakultetin Filozofik.
Pasi procedurat për vendimin përfundimtar për rastin e plagjiaturës Bujar Dugolli dhe Ardian Kastrati po marrin kohë siç ndodhë rëndon në Universitetin e Prishtinës, kemi vendosur që nga tash e tutje të kalojmë në aktivizëm gueril.
Në të gjitha rastet kur institucionet tregohen të paafta për t’i jetësuar vendimet meritore ndëshkuese për kryesit e shkeljeve, ORCA do të reagojë duke iu pamundësuar kryesve aktivitetin e tyre të përditshëm normal.
Nuk mund të ketë normalitet në situatë jonormale. Është jonormale që një profesor i dënuar për plagjiaturë të vazhdojë të shfaqet para studentëve, prandaj ne po e normalizojmë situatën duke mos lejuar që kjo të ndodhë.
Ne u arrestuam, por do të vazhdojmë luftën kundër plagjiaturës!
