Memli Krasniqi i PDK-së dhe Lumir Abdixhiku i LDK-së që nga fillimi i kësaj jave po qëndrojnë në ShBA. Dy liderët opozitarë kanë takuar zyrtarë të ndryshëm amerikan, përfshirë të dërguarin e posaçëm të ShBA-së për Ballkanin Perëndimor, Gabriel Escobar. Nga atje Memli e Krasniqi kanë dërguar mesazhe për Qeverinë Kurti.
Natyrisht mesazhi qendror i dy kryeopozitarëve ishte nevoja për bashkërëndim të hapave të Qeverisë së Kosovës, të udhëhequr nga kryeministri Albin Kurti, dhe Shteteve të Bashkuara. Sipas atyre, Qeveria Kurti nuk duhet të rrezikojë marrëdhëniet me ShBA-në, të cilën e cilësuan aleat strategjikë të Kosovës.
Intervista e Abixhikut
Lumir Abdixhiku mbajti një qëndrim prej lideri të moderuar, që në udhëtime jashtë vendi vë përpara interesat e Kosovës. Përkundër që gazetarja “insistoi” që Abdixhiku të fliste për krizën energjetike, koston e shtrenjtuar të jetës e ikjen e qytetarëve nga Kosova, i pari i LDK-së “refuzoi në mënyrë estetike” të komentonte çështje të politikës së brendshme.
“Por në vizitën tonë në Ëashington, këto tema të brendshme të Kosovës nuk i kemi pasur në agjendë, për neve këtu ka qenë agjenda e rrugëtimit historik që LDK ka pasur tash e 33 vite që në thelb është ruajtja, mirëmbajtja dhe ecja e sigurt në hapa të përbashkët me aleatin tonë kryesor, Shtetet e Bashkaura të Amerikës”, theksoi para fundit të intervistës.
Gjatë intervistës, z.Abdixhiku vlerësoi se Kosova duhet të ruaj stabilitetin brenda territorit të vetë dhe njëkohësisht të mirëmbajë marrëdhëniet me ShBA-në.
“Ne besojmë që janë dy çështje që Kosova duhet t’i ketë parasysh, dhe ajo më e rëndësishmja ka të bëjë me stabilitetin brenda territorit të vetë, pra brenda Republikës së Kosovës. Është esenciale që në kohë të zhvillimeve të ndryshme të sigurisë në kontinent Kosova të mos bëhet vatër e provokimeve të Serbisë që më pas do të prodhonin situata të paparashikueshme, por që në këtë fazë për Kosovën është e rëndësishme që të ketë koordinim të plotë me faktorin ndërkombëtar me theks të veçantë me SHBA-të dhe aleatë të tjerë evropianë”, tha ai dje.
Madje sipas Abdixhikut, moskoordinimi i Kosovës me aleatët e saj mund të sjell destabilizimit të vendit.
“Besoj që çdo vonesë në këtë koordinim të ngushtë lenë hapsirë edhe për destabilizim të vendit edhe për situata të paparashikueshme, por mbi të gjitha lë gjurmë të pariparueshme të realacioneve që Kosova duhet t’i ketë ngushtë me aleatët e vetë”, ka thënë ai.
Intervista e Krasniqit
Në intervistën e tij, Memli Krasniqi ishte më i ashpër se Abdixhiku. Për dallim nga kryetari i LDK-së, Krasniqi i PDK-së disi mbeti “peng” i gjuhës opozitare, duke theksuar se refuzimi i Kurtit ka sjell një “një ndjenjë të mosrespektit” në SHBA ndaj kërkesave të tyre.
“Besoj që çdo qytetar i Kosovës nuk ndjehet mirë me faktin që ne sot në Shtetet e Bashkuara të Amerikës kemi një ndjenjë të mosrespektit ndaj kërkesave të tyre. Është e vërtetë që kryeministri i Kosovës tashmë dy herë brenda këtij viti i ka thënë JO sekretarit të Shtetit në Departamentin e Shtetit. Është diçka që ne zakonisht nuk e kemi arsyetuar në të kaluarën jo për arsye që duhet t’i nënshtrohemi çdo kërkese që vjen nga partnerët tanë, po për faktin që është dëshmuar historikisht që shteti amerikan gjithmonë e ka pasur interesin e Kosovës si bazë të kërkesave dhe veprimeve në raport me Kosovën, me popullin e Kosovës, me popullin shqiptar dhe me rajonin e Ballkanit Perendimor në përgjithësi.”, tha Krasniqi.
E kur gazetarja e pyeti për Asociacionin, Krasniqi megjithatë bëri një përgjigje të mirë diplomatike.
“Zëri i Amerikës: Pra ju jeni për zbatimin e vendimit të Gjykatës Kushtetuese, pra që të hartohet statusi i asociacionit të bëhen ndryshimet e nevojshme, ato që ka propozuar Gjykata Kushtetuese dhe të proçedohet.
Memli Krasniqi: Ajo duhet të ndodhë në kuadër të një marrëveshje të përgjithshme, pra që sjell njohjen e ndërsjelltë mes Kosovës dhe Serbisë.
Zëri i Amerikës: Marrëveshja fillimisht pastaj asociacioni?
Memli Krasniqi: Duhet të jetë gjithçka pjesë e kësaj marrëveshje. Ne gjithmonë kemi thënë që mënyra për tu qasur dialogut duhet të jetë ‘nuk jemi dakorduar për asgjë pa u dakorduar për gjithçka”- u përgjigj Krasniqi.
Ndryshe tashmë është paralajmëruar mundësia e një marrëveshje për çështjen e targave, që ka qenë kryetema e muajve të fundit në dialogun mes Kosovës dhe Serbisë.
