Këtë artikull nuk po e nisim si zakonisht! Ndoshta si asnjëherë më parë, redaksia e gazetës Veriu.info ishte në dilemë të madhe ta publikoj ose jo këtë video. U konsultuam mes veti në redaksi, por prapë kishim dilema, për të vazhduar më pas konsultat me njohës të jashtëm të gazetarisë dhe ekspert të funksionimit të rrjeteve sociale. Argumentuesit e publikimit të videos, arsyetonin se duhet publikuar për t’u shpërfaqur rreziku real ndaj opinionistes Zana Avdiu dhe më pas marrja e masave nga ajo përmes rrugëve ligjore, ndërsa argumentuesit e mos publikimit të videon arsyetonin se po ju jepet hapësirë për promovim kërcënuesve. Përfundimisht redaksia e Veriu.info vendosi për publikimin e videos.
Ishte ora 22:39 e mbrëmjes së djeshme, kur një numër me prefiks të Serbisë telefonin në numrin e redaksisë së Veriu.info dhe me t’u përgjigjur ai prezantohet se është një shqiptar nga Bujanoci, duke thënë se dëshiron të publikoj një reagim me video ndaj Zana Avdiut rreth tematikës së reagimit të saj për një veprim të futbollistit Granit Xhaka. Qytetari udhëzohet që videon ta dërgoj në numrin e Veriu.info në Viber, të cilën e dërgon menjëherë duke kërkuar edhe me tekst publikimin e saj.
Në këtë video me përmbajtje shokuese, ai e kërcënon rëndë me jetë aktivisten Zana Avdiu, kërcënim të cilin Veriu.info nuk po e përshkuan me tekst për shkak të eleminimit të mundësisë së qasjes në teskt të fëmijëve, përderisa në kanalin e Veriu.info në Youtube për të shikuar videon e kemi kufizuar mundësinë e shikimit të saj nga personat nën 18 vjeç.
Veriu.info ju sjell videon e plotë, e cila ndalohet rreptësisht nga personat nën 18 vjeç :
Ky kërcënim serioz i tij ka ardhur pas reagimit të aktivistes Zana Avdiu për futbollistin Granit Xhaka, duke e quajtur këtë të fundit rrugaç pas veprimit të tij në fushë kundrejt futbollistëve serbë. Zana Avdiu ka marrë kërcënime të shumta pasi kundërshtoi veprimin e Granit Xhakës kundër kombëtares serbe.
