Abuzimi me alkoolin është ndër shkaktarët më të shpeshtë të dhunës që përjetojnë gratë në Kosovë nga partnerët e tyre. Kjo pasi që konsumimi i tepërt i alkoolit po bën që burrat shpesh të humbin kontrollin mbi veprimet e tyre, duke u bërë kështu agresivë e duke krijuar probleme, raporton Gazeta Sinjali.
Në ngjarje e rëndë ka ndodhur të shtunën në fshatin Zojz të Prizrenit, ku një burrë dyshohet se ka dëbuar nga shtëpia bashkëshorten e tij me pesë fëmijët që kanë nga martesa e përbashkët.
Sinjali mëson se viktima bashkë me fëmijët pasi ka mbetur në rrugë ka kërkuar ndihmën e Policisë së Kosovës, ku ka denoncuar bashkëshortin për dhunë në familje.
Si rezultat i denoncimit, i dyshuari është arritur që të arrestohet dhe i njëjti është shoqëruar në stacion policor e më pas i është nënshtruar edhe alkotestit, ku ka rezultuar në gjendje të dehur.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit në kohëzgjatje prej 48 orësh dhe i njëjti do të hetohet nën dyshimet për kryerjen e veprës penale ‘Dhunë në familje’.
