Analisti i afërt me qeverinë, Bleron Baraliu ka thënë se “është shumë e turpshme” që Ambasadori i Kosovës në Kroaci, Martin Berishaj, vazhdon të ruajë detyrën e diplomatit.
Në një reagim në Facebook të enjten, Baraliu ka thënë se Qeveria e Kosovës duhet ta shkarkojë Ambasadorin Berishaj.
Ai ka thënë se përveç shkarkimit, Berishajt duhet konsideruar t’i hiqet shtetësia e Kosovës.
“Citati dhe përvoja që sjell këtu dëshmojmë se është shumë e turpshme që MB vazhdon të ruaj titullin e diplomatit shqiptar (nga RKS). Jo vetëm përjashtim, por edhe shtetësinë duhet konsideruar a ka të të drejtë ta ruaj MB”, ka thënë Baraliu.
“Nejse, një MeJ me një ministre tejet jokompetente e amatere nuk di as unë si mund presim vepra domethënëse. Turpi deri në kulm në i mbuloftë prapë veç sorollatje të gazrave nëpër tirqi mund të vërejmë”, ka deklaruar Baraliu.
Qëndrimin e tij, Baraliu e ka bazuar në një deklaratë të Martin Berishajt në vitin 1989 në Lublanë të Sllovenisë, kur fliste për emancipimin e shqiptarëve nga shqiptaria në jugosllovenizëm.
Këtë deklaratë të Ambasadorit Berishajt e ka publikuar sot ish-gazetari Salih Kabashi.
“Do të kthehesha në një problem i cili për mua duket se është jashtëzakonisht i rëndësishëm. Ky është problemi i emancipimit politik të shqiptarëve në Jugosllavi, i cili sipas mendimit tim mund të paraqet një element i konfirmimit të legjitimitetit të tyre politik në vet Jugosllavi, dhe pohoj se ky emancipim politik i shqiptarëve në Jugosllavi duhet të thotë emancipim politik i shqiptarizmit nga jugoslovenizmi”, thuhet në deklaratën e Martin Berishajt më 1989 në Slloveni.
Salih Kabashi ka thënë se në këtë deklaratë, Martin Berishaj kundërshtonte tezat lidhur “mbi shtypjen e Kosovës, eminencat e madhështitë intelektuale si Branko Horvat, Fehmi Agani, Gani Bobi, Hivzi Islami, Rexhep Ismaili në Tryezën Kosova – Serbia- Jugosllavia të organizuar nga Slavko Gaber e Toni Kuzmançiq në Cankarjev Dom të Lubjanës”.
