Kryetari i Shoqatës Sindikale të Shërbyesve Civilë, Ali Sefaj, ka thënë se me ligjin e ri për paga, Qeveria ua ka ndalur disa beneficione që i ka gëzuar deri sot administrata shoqërore.
Sefaj në emisionin ‘Pressing’ në T7 tha se punëtorët tani nuk do t’i marrin 3 paga, siç i kanë takuar deri sot, siç ishin paga jubilare, paga në rast të vdekjes së një familjari të ngushtë dhe pagën me rastin e pensionimit.
“Me këtë ligj, hiqen edhe disa beneficione që i ka gëzuar administrata shoqërore deri tashmë, sic ka qenë paga jubilare. Ka qenë një pagë modeste, kemi pas një pagë në rast të vdekjes së ngushtë të anëtarit të familjes dhe një pagë me rastin e pensionimit. Për ne ka qenë e papranueshme, i kemi kërku që së paku të jenë 3 paga, tash zyrtari kur të del në pension, ka punuar për 20 vite apo më shumë në Republikën e Kosovës dhe Republika e Kosovës i thotë me këtë pagë ti del në pension dhe Republika si shenjë falënderimi për ty nuk I ka as 5 cent që t’i ndajë”, tha Sefaj.
Tutje ai tha se qeveria do të duhej të kishte mirëkuptim, pasi thotë se është e majtë.
“Me ligjin për skemën pensionale nuk ua njeh as kontributin që at aua kanë dhënë, por ua njeh njerëzve që kanë punuar për Millosheviqin, që ua kanë marrë jetën këtyre zyrtarëve. Po flas për sektorin e administratës shtetërore. Ua kanë marrë vendet e punës, ua kanë marrë banesat që ua ka nda dikur Jogusllavia dhe tani më ua marrin edhe pensionet. Qeveria do të duhej të kishte mirëkuptim, meqenëse është e majtë, apo të thotë që nga mbrëmja që kemi fjetur, dhe s’ka mbetur asgjë nga e majta, jemi të djathtë“.
