Ligji i punës do të jetë ai përmes së cilit do të paguhen orët shtesë të punës, ka deklaruar Ministri i Financave, Punës dhe Transfere, Hekuran Murati.
Murati ka thënë se nevoja për ligjin e pagave vjen si rrjedhojë e nevojës së një standardizimi. Sipas koeficientit të ri të prezantuar nga Qeveria e Republikës së Kosovës, pagat e reja për policët e lartë do të jenë 619 euro, me një rritje prej 227 eurosh.
Për Policinë, Murati ka thënë se në koeficientë përfshihen edhe shtesat për rrezikshmërinë.
“Arsyeja pse ka lindur nevoja për një ligj është që të ketë një standardizim. Dmth mund të ketë edhe paga të personave të caktuar nëpër institucione që e kalojnë ndoshta edhe 1000 euro ku pagën bazë mund ta kenë nën 500 dhe kjo ka ndodhur pikërisht për shkak të mungesës së një standardizimi ku dikush ka marrë shtesa 700 euro, dikush e ka marrë vetëm pagën bazë…domethënë kjo ka ndodhë. Tash sa i përket policisë, koeficientet që janë, ka shtesa të rrezikshmërisë të cilat janë për njësitet që ekspozohen përtej rrezikut normal kurse një pjesë e rrezikshmërisë për policinë që llogaritet, pra që ta kenë, e kanë të përfshirë në page”, ka deklaruar ai në Rtv Dukagjini.
Mirëpo në ligjin për paga, nuk do të hyjë çështja e pagesave për orët shtesë.
“Orët shtesë paguhen me ligj të punës. Pra nuk kufizohen apo nuk rregullohen me këtë ligj”, ka deklaruar Murati gjersa ka theksuar se “Pagesa e rrezikshmërisë rregullohet tash me akte nënligjore të cilat siç e thash, edhe në konferencë sot edhe në mbledhje të Qeverisë, do të finalizohen brenda kësaj jave. Mirëpo, për rrezikshmërinë që e sjell profesioni si i tillë, pra qoftë i Policisë, zjarrfikësit apo këto, synimi ka qenë që shtesa e rregullt apo rrezikshmëria të llogaritet në pagën bazë kurse për veprimet, për njësitë që ekspozohen ndaj rreziqeve shtesë por edhe për aksionet që mund të marrë dikush pjesë edhe jashtë detyrës së rregullt, ka shtesa të rrezikshmërisë që do të aplikohen”, ka deklaruar Murati.
