Policia e Kosovës ka blerë gazmaska në vlerë prej 225 mijë eurove.
Përmes procedurës së hapur, ky institucion ka shpërblyer me tender kompaninë, Sodex Group.
Kontrata mes palëve është finalizuar më 2 shkurt 2023, gati tre muaj pasi i njëjti biznes u rekomandua të jetë fitues.
Policia kishte planifikuar në hapjen e tenderit blerjen e 728 gazmaskave, teksa në të njëjtin përshkrim janë futur edhe çanta, filteri dhe boca e ujit.
Kompania Sodex Group ishte e vetmja që aplikoi për këtë tender.
Kjo vërehet në procesverbalin e hapjes së ofertave.
Vlera me të cilin konkurroi biznesi në fjalë ishte pothuajse e ngjashme me vlerën e planifikuar nga Policia në këtë tender.
Policia kishte zotuar 225 mijë e 680 euro, kurse kompania ofertoi me 225 mijë e 388 euro, raporton “Front Online”.
Rreth Sodex
Kompania Sodex Group është regjistruar si biznes në vitin 2012.
Pronare e saj, sipas të dhënave në uebfaqen e Agjencisë për Regjistrimin e Bizneseve, është Zaide Pira.
Aktivitet primar i saj është tregtia me shumicë e tekstileve, kurse sekondar tregtia me shumicë e veshjeve dhe këpucëve.
Kompania ka fituar me dhjetëra tenderë në të kaluarën nga Policia e Kosovës.
Gazmaska dhe përdorimi i saj në Kuvend
Gazmaska është një pajisje që një person vendos mbi fytyrë për të mbrojtur kundër frymëmarrjes së gazrave helmuese.
Ky është kuptimi që i jep kësaj fjale fjalori i Cambridge.
Këtë pajisje e patën vendosur policët më 2015, për t`u mbrojtur nga gazi lotsjellës që Lëvizja Vetëvendosje e përdorte në Kuvendin e Republikës së Kosovës.
Partia që sot është në pushtet, asokohe kundërshtonte me këso veprime krijimin e Asociacionit të komunave serbe dhe demarkacionin me Malin e Zi.
Katër deputetët e VV-së u shpallen fajtorë për hedhjen e gazit lotsjellës
Gjykata e Prishtinës në vitin 2018 kishte shpallur aktgjykimin në rastin e deputetëve të Kuvendit të Kosovës nga radhët e Lëvizjes Vetëvendosje, të akuzuar për gazin lotsjellës të hedhur në ambientet e Kuvendit.
Ajo kishte shpallur fajtorë katër deputetët: Albin Kurti, Donika Kadaj-Bujupi, Faton Topalli dhe Albulena Haxhiu.
Për përdorim të armës, Albin Kurti ishte dënuar me 1 vjet e 3 muaj burg, për pengim të personit zyrtar me 6 muaj burg.
Dënimi është me kusht me periudhë verifikimi 2-vjeçare.
Albulena Haxhiu për përdorim të armës është dënuar me 1 vit e 2 muaj burgim. Për pengim të personit zyrtar me 4 muaj. Dënimi unik: 1 vit e 3 muaj.
Donika Kadaj-Bujupi për përdorim të armës është dënuar me 1 vit e 3 muaj, për pengim të personit zyrtar me 6 muaj burgim. Dënim unik: 1 vit e 6 muaj.
Ndërsa, Faton Topalli për përdorim të armës është dënuar me 1 vit burgim dhe për pengim të personit zyrtar me 3 muaj burg. Dënimi unik: 1 vit e dy muaj.
