Përparim Gruda, koordinator për drejtësi në PDK iu ka përgjigjur Ministres së Drejtësisë, Albulena Haxhiut lidhur me reagimin e saj ndaj dërgimit të Projektligjit për Byronë Shtetërore për Verifikimin dhe Konfiskimin e Pasurisë në Gjykatën Kushtetuese.
Gruda ka thënë se Haxhiu po tenton ta largojë vëmendjen nga skandali i zhdukjes së mostrave të Deharit, në këtë formë duke akuzuar PDK-në pse e dërgoi në Kushtetuese Byronë.
Ai thotë se Haxhiu nuk do të duhej të kishte frikë nga Kushtetuesja, por që do të duhej ta respektonte e mirëpriste vendimin e saj.“Ministrja e Drejtësisë nuk mund të largoj vëmendjen nga skandali i zhdukjes së mostrave të rastit Dehari duke sulmuar PDK-në pse ka dërguar në Gjykatën Kushtetuese Ligjin për Byronë. Në çdo demokraci normale, një Ministre e Drejtësisë do të duhej të mos kishte frikë nga Gjykata Kushtetuese, por ta mirëpriste vendimin e saj. Kosova duhet të ndahet njëherë e mirë nga logjika e gazit lotsjellës dhe e dhunës në institucione, dhe të kthehet të logjika, parimet dhe vlerat e Kushtetutës, të cilën ne do ta mbrojmë çdo ditë”, ka shkruar Gruda.
