Përleshjet mes të burgosurve në qendrat korrektuese në vendin tonë nuk janë edhe aq të rralla. Raste të tilla e incidente të tjera, siç është ikja e të dënuarve janë goxha të shpeshta dhe po ndodhin pikërisht në kohën kur ministrja e Drejtësisë, Albulena Haxhiu po krekoset se po udhëheq suksesshëm me ministrinë dhe ka rritur nivelin e sigurisë në burgje.
Gazeta Sinjali ka raportuar së fundmi për plot ngjarje të tilla, sidomos në Burgun e Dubravës. Rrahjet në këtë qendër janë shpeshtuar dhe rasti i fundit ka ndodhur të mërkurën në mbrëmje.
Sipas informacioneve të para, i dënuari B.M., kosovar e ka sulmuar fizikisht të dënuarin tjetër I.A., shtetas jordanez, të cilin fillimisht e kishte rrëzuar përtokë e më pas e ka grushtuar.
Si masë parandaluese që të mos eskalohet situata, oficerët kanë ndërhyrë, ndërsa i burgosuri që u sulmua ka marrë trajtim mjekësor, teksa është njoftuar edhe Prokurori i Shtetit, që ka urdhëruar inicimin e rastit për “Sulm”.
I dënuari që dyshohet në deklaratën që e ka dhënë para zyrtarëve policorë e ka pranuar se ka pasur mosmarrëveshje me të dënuarin tjetër, por e ka mohuar ta ketë sulmuar fizikisht.
