Të martën, policia e Kosovës, më konkretisht departamenti i Krimeve Ekonomike ka arrestuar dy persona të dyshuar për veprën penale të “keqpërdorimit të detyrës zyrtare”.
Ndër dy të arrestuarit ishte edhe ish-kandidati i Partisë Demokratike të Kosovës për kryetar të Komunës së Rahovecit, Bejtullah Deliu, nën dyshimin për futje në treg të parave të falsifikuara.
Por, i njëjti rezulton që është përjashtuar nga të gjitha funksionet e Partisë Demokratike të Kosovës në Degën e saj në Rahovec.
Sipas një komunikate zyrtare në faqen e Facebookut, PDK kishte njoftuar katër muaj më parë se pas konsultimeve në kryesi, kishin marrë vendim unanim që bartësi i listës Bejtullah Deliu nuk e përfaqëson PDK-në në Kuvendin Komunal dhe kishin kërkuar t’ia kthejë mandatin subjektit politik.
Arsyet për këtë vendim ishin sabotimi i thirrjeve nga niveli qendror dhe lokal të partisë si dhe refuzimi i pjesëmarrjes në takimet e nivelit qendror dhe lokal të PDK-së. /Paparaci.com/
