Zëvendësministri i Drejtësisë, Blerim Sallahu, përmes një postimi në Facebook njoftoi se ka nënshkruar vendimin për pushim nga puna ndaj përmbaruesit privat Ilir Mulhaxha.
Sallahu kishte treguar dhe arsyen e shkarkimit, ku duke ju referuar gjetjeve të Komisionit Disiplinor për Përmbarues Privat, thuhet se Mulhaxha gjatë kryerjes së veprimeve përmbarimore në kuadër të aktivitetit të tij, nuk iu ka përmbajtur ligjit, në lëndën e përmbarimit.
“Sapo kam nënshkruar vendimin për pushim nga detyra të përmbaruesit privat z. Ilir Mulhaxha. Komisioni Disiplinor për Përmbarues Privat ka gjetur shkelje disiplinore pasi që i njëjti gjatë kryerjes së veprimeve përmbarimore në kuadër të aktivitetit të tij, nuk iu ka përmbajtur ligjit, në lëndën e përmbarimit, dhe si rrjedhojë është shqiptuar masa disiplinore, shkarkim nga detyra”, ka shkruar Sallahu.
E ndaj këtij vendimi, ka reaguar Mulhaxha i cilo thotë se është pushuar nga ushtrimi i funksionit të përmbaruesit privat përmes Facebook-ut të Sallahut.
Ai ka thënë se nuk e di cilat shkelje ligjore pretendohet se janë gjetur.
“Unë nuk kam pranuar ende vendimin e komisionit dhe nuk e di për cilat shkelje ligjore pretendohet. Gjithashtu, ende deri në ditën e sotme nuk e kam parë procesverbalin e seancës dëgjimore, të cilin Ministria ende nuk ma ka dorëzuar që ta nënshkruaj dhe të njëjtin ta pranoj”- ka thënë ai.
Mulhaxha tutje ka thënë se me përgjegjësi të plotë morale dhe ligjore deklaron se nuk ka bërë asnjë shkelje ligjore.
“Po, unë kam vetëm një faj, që ushtroj profesionin e përmbaruesit privat, mirëpo si duket fajin më të madh e kam që jam vëllai i deputetes”- ka thënë ai.
Ilir Mulhaxha është vëllai i deputetes së Kuvendit të Kosovës nga radhët e Lëvizjes Vetëvendosje, Fatmire Mulhaxha – Kollçaku.
Ndryshe, më 10 janar 2023, ministrja e Drejtësisë, Albulena Haxhiu, kishte njoftuar për suspendimin e përmbaruesit privat, Ilir Mulhaxha.
Përmes një postimi në Facebook, Haxhiu kishte thënë se vendimi në fjalë erdhi pas kërkesës nga Agjencia Kosovare e Privatizimit (AKP) për inicim të procedurës disiplinore ndaj tij, mbi bazën e shkeljeve të pretenduara.
“Andaj, për t’u siguruar që procedura disiplinore zhvillohet pa pengesa dhe pa asnjë ndikim, kam marrë vendim siç përcaktohet në dispozitiv. Nuk mund të tolerojmë që mbi kurrizin e interesit të përgjithshëm të realizohen interesa të kundërligjshme personale”, kishte shkruar Haxhiu.
