Kryetari i Nismës Socialdemokrate, Fatmir Limaj, i shoqëruar nga Kudusi Lama dhe anëtarë të Nismës Socialdemokrate kanë bërë homazhe në Prekaz në 25 vjetorin e shënimit të Epopesë së UÇK-së.
Me këtë rast, Limaj ka thënë se Prekazi është vendi ku liria ka marrë jetë.
“Flijimi për liri i familjes Jashari është shembulli më unik, i cili na kujton që, ajo që sot e gëzojmë është rezultat i sakrificës së kësaj familjeje”, ka thënë ndër të tjera Limaj.
Postimi i plotë:
Në 25 vjetorin e shënimit të Epopesë së Ushtrisë Çlirimtare të Kosovës, kryetari Limaj me bashkëpunëtorë bëri homazhe në Prekazin heroik
Kryetari i Nismës Socialdemokrate, Fatmir Limaj me bashkëpunëtorë sot kanë bërë homazhe në Prekaz, ku pikërisht më 5, 6 dhe 7 mars të vitit 1998, u ngritën themelet e shtetit tonë. Prekazi është vendi ku pavarësia dhe liria kanë marrë jetë dhe do të jetë në obligimin tonë gjithnjë për të qenë në shërbim të lirisë dhe pavarësisë së vendit tonë, theksoi në një deklaratë për media, kryetari Limaj.
Gjithashtu, kryetari Limaj tha se, me pietet kujtojmë sakrificën e pashembullt të familjes Jashari në krye me komandantin legjendar Adem Jashari. Flijimi për liri i familjes Jashari është shembulli më unik, i cili na kujton që, ajo që sot e gëzojmë është rezultat i sakrificës së kësaj familjeje.
Duke nderuar Epopenë dhe familjen Jashari, nderojmë gjithë dëshmorët e rënë për lirinë e vendit tonë.
Lavdi e përjetshme jetës dhe veprës së komandantit legjendar, Adem Jashari, familjes së tij dhe gjithë dëshmorëve të Kombit!
