Policia e Kosovës ka realizuar javën që shkoi një aksion, i cili ka rezultuar me 15 të arrestuar. Gjatë këtij aksioni u kontrolluan dhe u bastisën 21 autosallone, shtëpi dhe lokale përcjellëse në Prishtinë, Ferizaj dhe Vushtrri, nën dyshimet për shmangie tatimi dhe fajde.
Në mesin e personave të arrestuar ishte edhe Skender Bajrami – pronari i autosallon “Alberti”, i cili dyshohet për tri vepra penale të dhënies së fajdes. Bajrami është edhe njëri prej aksionarëve kryesore në Qendrën Tregtare “Prishtina Mall” me 17 milionë euro investime, e cila zyrtarisht do të hapet me 9 mars.
Veriu.info ka mësuar krerët e disa prej intitucioneve të Kosovës kanë marrë ftesë që të jenë pjesë në ceremoninë inauguese të “Prishtina Mall”
Mirëpo, meqenëse njëri prej aksionarëve është arrestuar javën e kaluar për dhënie të fajdes, Veriu.info ka drejtuar pyetje ndaj krerëve kryesor të institucioneve dhe partive politike, përfshirë edhe kryeparlamentarin Glauk Konjufca, për të kuptuar nëse do të marrin pjesë në këtë ceremoni inauguruese të qendrës më të madhe tregtare në Kosovë.
I pyetur se “a do të marrë pjesë Kryetari i Kuvendit të Kosovës, z. Glauk Konjufca në përurimin e Qendrës Tregtare “Prishtina Mall” dhe se a mendoni që ky do të ishte është veprim i qëlluar, pasi që njëri prej aksionarëve kryesor (Skender Bajrami) është arrestuar me 2 mars për fajde”, Ilir Kërçeli, shef i Kabinetit të Kryeparlamentarit Konjuca ka thënë se ai nuk do të marrë pjesë.
“Kryetari Konjufca nuk do të marrë pjesë në hapjen e qendrës tregtare Prishtina Mall, dhe konfirmoj se nuk është në agjendën e Kryetarit pjesëmarrja në këtë event”, ka thënë Ilir Kerçeli në një prononcim për Veriu.info.
