Deputeti i Parlamentit Evropian, slloveni Klemen Groshelj në një intervistë ka thënë se asnjë palë nuk mund ta refuzojë thjesht marrëveshjen për Kosovën dhe se qëllimi parësor është ulja e tensioneve ndërmjet Beogradit dhe Prishtinës.
Groshelj ka thënë se rreziku i madh për Serbinë është se disa vende anëtare të BE-së që e shohin atë si ‘Rusi Ballkanike’.
Sipas tij, marrëveshja për normalizimin e marrëdhënieve mes Kosovës dhe Serbisë, është një përpjekje për të gjetur emëruesin më të ulët të përbashkët për të dyja vendet.
“Unë e shoh këtë marrëveshje si një përpjekje për të gjetur emëruesin më të ulët të përbashkët mes Serbisë dhe Kosovës. Vlerësimi i BE-së është se kjo është e pranueshme për Serbinë dhe në anën tjetër për Kosovën. Marrëveshja nënkupton njohjen e Serbisë, por në të njëjtën kohë nënkupton që Serbia nuk do ta njohë zyrtarisht Kosovën. Do të thosha se ky është kreativiteti maksimal i diplomacisë së Brukselit në zgjidhjen e kësaj çështjeje”, ka thënë ai.
Groshelj po ashtu ka thënë që asnjëra palë nuk mund ta refuzojë marrëveshjen.
“Më duket se marrëveshja është krijuar në atë mënyrë që asnjëra palë nuk mund ta refuzojë atë thjesht. Mendoj se kjo marrëveshje, nëse nënshkruhet, do të kërkojë përfundimisht negociata shtesë për disa detaje. Mendoj se kjo është vetëm një marrëveshje ombrellë dhe se ideja është të bien dakord më vonë, kur gjërat të fillojnë të funksionojnë, për gjëra për të cilat ata nuk mund të bien dakord tani. Kam përshtypjen se një ide e tillë është në prapavijë dhe se BE-ja dhe SHBA-ja aktualisht po përpiqen të bindin palën kosovare, serbe dhe shqiptare, sepse në këtë proces ka rol edhe diplomacia e tyre dhe kryeministri Edi Rama”, ka shtuar ai.
Po ashtu, ai ka folur për njohjen reciproke në fund të procesit të dialogut, teksa ka thënë se primare është zvogëlimi i mundësisë së tensioneve të reja, përshkallëzimit të situatës dhe destabilizimit të marrëdhënieve.
“Nuk mendoj se kjo është një ide për momentin. Ky është një objektiv në të ardhmen afatmesme apo afatgjatë. Me sa kuptova, tani primare është zvogëlimi i mundësisë së tensioneve të reja, përshkallëzimit dhe destabilizimit të marrëdhënieve. Dhe nuk po flas vetëm për marrëdhëniet ndërmjet Serbisë dhe Kosovës, por gjithë Ballkanit Perëndimor”, ka thënë Groshelj në një intervistë për mediumin serb Nova.
