Pesë vetura me targa RKS janë djegur gjatë dy netëve të fundit në Veri të vendit.
Këto veprime po ndodhin pak javë para mbajtjes së zgjedhjeve të jashtëzakonshme në Veri dhe pak javë pas marrëveshjes së Ohrit.
Eksperti i sigurisë, Nuredin Ibishi, duke folur për këtë situatë tha se Polcia e Kosovës duhet të shtojë prezencën në Veri.
Ibishi tha se Kosova duhet të alarmojë bashkësinë ndërkombëtare me atë se çfarë po ndodh në Veri.
“Kjo që po ndodh tregon vazhdimësinë e përdorimit të ekstremit serb në Veri të Kosovës në kuadër edhe të marrëveshjes por edhe të përgatitjes për zgjedhjet në Veri të Kosovës. Mendoj se Policia e Kosovës duhet ta shtojë prezencën fizike .Lista Serbe tashmë ekstremisht po vlerësohet si dorë e zgjatur e Vuçiqit për interesat e tij por edhe interesat e interferimit në Kosovë. Nuk duan të dëgjojnë zë tjetër të ndonjë subjekti tjetër që është konkuret në zgjedhjet në Veri. Mendoj se kjo situatë do të vazhdojë derisa Policia të del me të gjeturat rreth këtyre rasteve, për këtë arsye mendoj se është e nevojshme të shtohet më shumë prezenca, të alarmohet Bashkësia Ndërkombëtare në lidhje me atë se çfarë po ndodh”
“Eshtë paragjykim të flitet derisa të zbulohet ngjarja, por realisht kjo është vepër e ekstremistëve serb që duan ta tensionojnë situatën me shenja të pasigurisë edhe duan ta kenë ndikimin e vet permes Listës Serbe dhe përfaqësuesve të saj, të cilët kanë qenë në pushtet dhe tani të dorëhequr. Për kete situatë duhet të alarmohet bashkësia ndërkombëtare, tani kemi edhe takimin e nivelit të lartë, dhe duhet që ata t’i thirrin qe ta rrespektojnë çdo marrëveshje.Vuçiq çdoherë do të luaj në dy drejtime, nga njëra ane duke perdorur Listën Serbe a këtej duke u paraqitur si konstruktiv. Policia e Kosovës duhet të kryejë punën e saj dhe më e mira do të ishte që ata të dalin me të dhëna, të dhëna të cilat gjithmonë të qojnë nga ekstremizmi serb” deklaroi Ibishi.
Nuredin Ibishi, Ekspert sigurie
Ndërsa anëtari i Komisionit për për Çështjet e Sigurisë dhe Mbrojtjes Mefail Bajqinovci, i cili vjen nga radhët e Lëvizjes Vetëvendosje tha se krejt kjo që po ndodh është për me i frikësu serbët lokale për zgjedhjet që pritet të mbahen në muajin prill.
Bajqinovci tha se kjo është fushatë që e kanë orkestru vetë strukturat ilegale me bekimin e Beogradit.
“Krejt krijimi i kësaj klime është me i frikësu për zgjedhjet që do të mbahen muajin që vjen. Kjo është fushatë që e kanë orkestru vetë strukturat ilegale me bekimin e Beogradit. Pra kjo është krejt fushatë e orkestruar me i frikësu serbët vendas për me u mbajt zgjedhjet në prill te cilat priten të mbahen” tha Bajqinovci.
Mefail Bajqinovci, deputet
Policia e Kosovës doli me njoftim për djegien e veturave gjatë dy netëve të fundit në Veri.
“Me 31 mars 2023 pas mesnatës, në veri të vendit është raportuar se nga persona të panjohur janë djegur edhe tri vetura që iu përkasin viktimave të nacionalitetit serb, të cilat kanë qenë të parkuara njëra në rrugën “Kral Milutin”- Zveçan, tjetra në rrugën “Ivo Lola Ribar”- Mitrovicë Veri, si dhe e treta në rrugën “Vlade Çetkoviq”- Mitrovicë Veri.
Pas dy veturave të djegura me datën 30.03.2023 në veri të vendit, pas mesnatës së datës 31.03.2023, iu është vënë zjarri edhe tri veturave të tjera, të cilat iu përkasin viktimave të nacionalitetit serb, e të cilat ishin regjistruar me targa të Republikës së Kosovës (RKS)” njofton Policia.
